ശ്രീനഗർ : ജമ്മു കശ്മീരിലെ രാജൗരി ജില്ലയിൽ ഭീകരരും സുരക്ഷാസേനയും തമ്മിൽ ഏറ്റുമുട്ടൽ. വനത്തിൽ ഭീകരരുടെ സാന്നിധ്യത്തെക്കുറിച്ചുള്ള രഹസ്യ വിവരം ലഭിച്ചതിനെത്തുടർന്ന് സുരക്ഷാ സേന കാട്ടിൽ തിരച്ചിൽ നടത്തുന്നതിനിടെ ഭീകരർ വെടിയുതിർക്കുകയും ഏറ്റുമുട്ടൽ ആരംഭിക്കുകയുമായിരുന്നു. രജൗരിയിലെ ഡോറിമൽ വനങ്ങളിൽ ആണ് ഏറ്റുമുട്ടൽ തുടരുന്നത്.
കുറഞ്ഞത് 2-3 തീവ്രവാദികൾ കുടുങ്ങിക്കിടക്കുന്നുണ്ടെന്ന് കരുതപ്പെടുന്നു, മറ്റ് തീവ്രവാദികൾക്കായി തിരച്ചിൽ പുരോഗമിക്കുകയാണ്. നിലവിൽ പ്രദേശത്ത് വൻ സന്നാഹത്തോടെ സൈന്യം പ്രത്യാക്രമണവും സംയുക്ത തിരച്ചിൽ ഓപ്പറേഷനും ആരംഭിച്ചിട്ടുണ്ട്. ഇന്ത്യൻ ആർമി, കേന്ദ്ര റിസർവ് പോലീസ് ഫോഴ്സ് , ജമ്മു കശ്മീർ പോലീസിന്റെ പ്രത്യേക ഓപ്പറേഷൻ ഗ്രൂപ്പ് എന്നിവർ സംയുക്തമായാണ് ഈ ദൗത്യം നിർവ്വഹിക്കുന്നത്. രജൗരിയിലെ കനത്ത വനവും കുന്നുകളും നിറഞ്ഞ പ്രദേശത്താണ് ഭീകരർ നിലയുറപ്പിച്ചിരിക്കുന്നത്. സുരക്ഷാ ഉദ്യോഗസ്ഥർ പ്രദേശം പൂർണ്ണമായും വളഞ്ഞിരിക്കുകയാണ്.
