പട്ടിണിയും കടുത്ത കടക്കെണിയും മൂലം ശ്വാസം മുട്ടുന്ന പാകിസ്താൻ്റെ സാമ്പത്തിക നട്ടെല്ല് പൂർണ്ണമായും തകർക്കുമെന്ന് പ്രഖ്യാപിച്ച് പാക് അധീന കശ്മീരിലെ (PoJK) പ്രവാസി കൂട്ടായ്മ. പൂഞ്ച്, മിർപൂർ മേഖലകളിൽ നിന്നുള്ള വിദേശ മലയാളികളെപ്പോലെ വിദേശത്ത് ജോലി ചെയ്യുന്ന കശ്മീരി പ്രവാസികളുടെ പുതിയ കൂട്ടായ്മയായ ‘ഓവർസീസ് കശ്മീരീസ് അവാമി ആക്ഷൻ കമ്മിറ്റി’യാണ് പാക് സർക്കാരിനെതിരെ ആഗോളതലത്തിൽ വലിയൊരു സാമ്പത്തിക ഉപരോധത്തിന് ആഹ്വാനം ചെയ്തിരിക്കുന്നത്. പാക് അധീന കശ്മീരിൽ ജനങ്ങൾക്ക് നേരെ പാക് പട്ടാളവും പോലീസും നടത്തുന്ന ക്രൂരമായ അതിക്രമങ്ങളും മനുഷ്യാവകാശ ലംഘനങ്ങളും എത്രയും വേഗം അവസാനിപ്പിക്കണമെന്നും, ജനങ്ങളുടെ അവകാശ പത്രിക പൂർണ്ണമായും അംഗീകരിക്കണമെന്നും ആവശ്യപ്പെട്ട് ജൂലൈ 15 വരെയാണ് ഇവർ ഇസ്ലാമാബാദിന് അന്ത്യശാസനം (Ultimatum) നൽകിയിരിക്കുന്നത്. അല്ലാത്തപക്ഷം പാകിസ്താനിലേക്കുള്ള എല്ലാത്തരം വിദേശ പണമൊഴുക്കും പൂർണ്ണമായി തടയുമെന്നാണ് പ്രവാസികളുടെ ഭീഷണി.
പാകിസ്താന്റെ ഏറ്റവും വലിയ സാമ്പത്തിക സ്രോതസ്സായ വിദേശ പണവിനിമയത്തെ (Remittance) നേരിട്ട് ബാധിക്കുന്ന ഈ സമരം പാക് ഭരണകൂടത്തെയും സൈന്യത്തെയും വലിയ തോതിൽ ആശങ്കപ്പെടുത്തുന്നുണ്ട്. ബ്രിട്ടൻ, യൂറോപ്പ് തുടങ്ങിയ പാശ്ചാത്യ രാജ്യങ്ങളിൽ സ്ഥിരതാമസമാക്കിയ ലക്ഷക്കണക്കിന് വരുന്ന മിർപൂർ-കശ്മീരി ഡയസ്പോറയാണ് പാകിസ്താൻ്റെ വിദേശനാണ്യ കരുതൽ ശേഖരത്തിന്റെ വലിയൊരു പങ്ക് സംഭാവന ചെയ്യുന്നത്. ഔദ്യോഗിക ബാങ്കിംഗ് ചാനലുകൾ വഴി പാകിസ്താനിലേക്ക് അയക്കുന്ന പണം പൂർണ്ണമായും നിർത്തലാക്കുമെന്നും പകരം മറ്റ് സമാന്തര മാർഗ്ഗങ്ങളിലേക്ക് ഇത് തിരിച്ചുവിടുമെന്നും ഇവർ പ്രഖ്യാപിച്ചിട്ടുണ്ട്. ഇതിന് പുറമെ പാകിസ്താൻ്റെ ഔദ്യോഗിക വിമാനക്കമ്പനിയായ പാകിസ്താൻ ഇന്റർനാショナル എയർലൈൻസിനെ (PIA) ആഗോളതലത്തിൽ ബഹിഷ്കരിക്കാനും പ്രവാസികൾ തീരുമാനിച്ചു കഴിഞ്ഞു. നിലവിലെ കടുത്ത വിദേശനാണ്യ പ്രതിസന്ധിയിൽ നിന്നും കഷ്ടിച്ച് രക്ഷപ്പെടാൻ നോക്കുന്ന പാകിസ്താന് ഈ ‘റെമിറ്റൻസ് ഉപരോധം’ താങ്ങാൻ കഴിയുന്നതിലും അപ്പുറമാണ്.
പാക് അധീന കശ്മീരിൽ കഴിഞ്ഞ കുറച്ചുകാലമായി ജനങ്ങൾ പാക് വിരുദ്ധ പ്രക്ഷോഭങ്ങളുമായി തെരുവിലാണ്. സമാധാനപരമായി പ്രതിഷേധിച്ച ജനങ്ങൾക്ക് നേരെ വെടിവെപ്പ് നടത്തുകയും അറസ്റ്റ് ഉൾപ്പെടെയുള്ള ക്രൂരമായ അടിച്ചമർത്തലുകൾ തുടരുകയും ചെയ്യുന്നതാണ് വിദേശത്തുള്ള പ്രവാസികളെ കടുത്ത തീരുമാനങ്ങളിലേക്ക് നയിച്ചത്. പ്രവാസികളുടെ ഈ അപ്രതീക്ഷിത സാമ്പത്തിക വിപ്ലവത്തെ പ്രതിരോധിക്കാൻ പാക് കേന്ദ്ര സർക്കാരിന്റെയോ സെൻട്രൽ ബാങ്കിന്റെയോ കൈവശം യാതൊരുവിധ നിയമപരമായ സംവിധാനങ്ങളുമില്ല. നയതന്ത്ര തലത്തിലും സാമ്പത്തിക തലത്തിലും പാകിസ്താനെ ആഗോള വേദിയിൽ ഒറ്റപ്പെടുത്തുക എന്ന ലക്ഷ്യത്തോടെയാണ് പ്രവാസികൾ മുന്നോട്ട് പോകുന്നത്. ജൂലൈ 15-നുള്ളിൽ ഷെഹ്ബാസ് ഷെരീഫ് സർക്കാർ പ്രക്ഷോഭകരുടെ ആവശ്യങ്ങൾക്ക് മുന്നിൽ മുട്ടുമടക്കിയില്ലെങ്കിൽ കനത്ത ഡോളർ പ്രതിസന്ധിയിൽ പെട്ട് പാകിസ്താൻ എന്ന രാജ്യം പൂർണ്ണമായും തകരുമെന്നാണ് സാമ്പത്തിക വിദഗ്ധർ വിലയിരുത്തുന്നത്.
