പശ്ചിമേഷ്യയിൽ ഭൗമരാഷ്ട്രീയ സംഘർഷങ്ങളും യുദ്ധഭീതിയും വൻതോതിൽ കടുക്കുന്ന പശ്ചാത്തലത്തിൽ, ആഗോള വിപണിയിലെ തടസങ്ങൾ ഒഴിവാക്കാൻ ബഹുരാഷ്ട്ര കമ്പനികൾ തങ്ങളുടെ പ്രധാന വിതരണ ശൃംഖലകൾ ഇന്ത്യയിലേക്ക് മാറ്റുന്നു. ഗൾഫ് മേഖലയിലെ ഒറ്റ വിതരണകേന്ദ്രത്തെ മാത്രം ആശ്രയിക്കുന്ന പരമ്പരാഗത രീതി ഒഴിവാക്കി, സുരക്ഷിത താവളമെന്ന നിലയിൽ ഇന്ത്യയെ പ്രധാന ചരക്ക് സംഭരണ കേന്ദ്രമാക്കാൻ (Global Distribution Hub) വൻകിട കമ്പനികൾ നീക്കം തുടങ്ങിയതായി ആഗോള ലോജിസ്റ്റിക്സ് ഭീമന്മാരായ ഡി.പി വേൾഡ് (DP World) വ്യക്തമാക്കി. ഇതോടെ അന്താരാഷ്ട്ര വ്യാപാര രംഗത്ത് വലിയൊരു കുതിച്ചുചാട്ടത്തിനാണ് ഇന്ത്യ സാക്ഷ്യം വഹിക്കാൻ പോകുന്നത്.
ഓട്ടോമൊബൈൽ, ഫാർമസ്യൂട്ടിക്കൽ, കെമിക്കൽ മേഖലകളിലെ പ്രമുഖ കമ്പനികൾ ഇതിനകം തന്നെ ദുബായിലെ വിഖ്യാതമായ ജെബൽ അലി ഫ്രീ സോണിനൊപ്പം ഇന്ത്യയിലെ ഡി.പി വേൾഡിന്റെ ഫ്രീ ട്രേഡ് വെയർഹൗസിംഗ് സോണുകളിലും (FTWZ) തങ്ങളുടെ പുതിയ വിതരണ കേന്ദ്രങ്ങൾ ആരംഭിച്ച് കഴിഞ്ഞു. ചരക്കുനീക്കത്തിൽ ഉണ്ടാകാനിടയുള്ള അപ്രതീക്ഷിത തടസ്സങ്ങൾ മറികടക്കാൻ നിലവിൽ പത്തു മുതൽ പന്ത്രണ്ടോളം വൻകിട ബഹുരാഷ്ട്ര കമ്പനികൾ തങ്ങളുടെ ഇൻവെന്ററിയുടെ വലിയൊരു ഭാഗം മുംബൈയിലേക്കും ചെന്നൈയിലേക്കും മാറ്റിയിട്ടുണ്ട്. ഇതിൽ ആഗോളതലത്തിൽ പ്രവർത്തിക്കുന്ന പ്രമുഖ ഓട്ടോമൊബൈൽ സ്പെയർ പാർട്സ് വിതരണക്കാരും ഉൾപ്പെടുന്നു. കൂടാതെ ഫാർമസ്യൂട്ടിക്കൽ, കെമിക്കൽ, കാർഷിക-വ്യവസായ മേഖലയിലെ നിരവധി വൻകിട കമ്പനികളും ചരക്കുകൾ ഇന്ത്യയിലേക്ക് മാറ്റുന്നവരുടെ മുൻനിരയിലുണ്ട്.
ചെങ്കടലിലെയും ഗൾഫ് മേഖലയിലെയും സംഘർഷങ്ങൾ കാരണം കപ്പൽ ചരക്കുനീക്കത്തിന് വലിയ തോതിൽ ഇൻഷുറൻസ് തുകയും സുരക്ഷാഭീഷണിയും വർദ്ധിച്ച സാഹചര്യത്തിലാണ് കമ്പനികൾ ഇന്ത്യയെ ബദൽ മാർഗ്ഗമായി കാണുന്നത്. ഇന്ത്യയിലെ വിപുലമായ റെയിൽ, റോഡ്, തുറമുഖ ശൃംഖലകളും അനുകൂലമായ കേന്ദ്ര സർക്കാർ നയങ്ങളും ആഗോള കമ്പനികൾക്ക് വലിയ ആത്മവിശ്വാസമാണ് നൽകുന്നത്. മുംബൈയിലെ നവഷേവ (JNPT), ചെന്നൈ തുറമുഖം എന്നിവയോട് അനുബന്ധിച്ചുള്ള അത്യാധുനിക വെയർഹൗസിംഗ് സംവിധാനങ്ങളാണ് കമ്പനികളെ പ്രധാനമായും ആകർഷിക്കുന്നത്. ഈ വൻകിട കമ്പനികളുടെ വരവോടെ ലോജിസ്റ്റിക്സ്, വെയർഹൗസിംഗ് മേഖലകളിൽ ഇന്ത്യയിൽ വൻതോതിൽ പുതിയ തൊഴിലവസരങ്ങൾ സൃഷ്ടിക്കപ്പെടുമെന്നാണ് സാമ്പത്തിക വിദഗ്ധർ വിലയിരുത്തുന്നത്. ദീർഘകാലാടിസ്ഥാനത്തിൽ ഏഷ്യ-പസഫിക് മേഖലയിലെ ഏറ്റവും വലിയ വ്യാപാര ഹബ്ബായി ഇന്ത്യ മാറുന്നതിന്റെ സൂചനയായാണ് ഈ മാറ്റത്തെ നിരീക്ഷകർ കാണുന്നത്.
