ഒരു സാധാരണ വായ്പ്പുണ്ണോ, തണുപ്പ് കാലത്ത് വരാറുള്ള തൊണ്ടവേദനയോ അല്ലെങ്കിൽ കുറച്ചു ദിവസത്തേക്ക് ശബ്ദത്തിൽ ഉണ്ടാകുന്ന ചെറിയൊരു മാറ്റമോ ഒക്കെ നമ്മളിൽ ഭൂരിഭാഗം പേരും വളരെ നിസ്സാരമായാണ് തള്ളിപ്പറയാറുള്ളത്. ചിലപ്പോൾ പുകവലിയുടെയോ, അലർജിയുടെയോ അല്ലെങ്കിൽ ചെറിയ അണുബാധയുടെയോ ഫലമാണിതെന്ന് കരുതി സ്വയം ചികിത്സ നടത്തുന്നവരും കുറവല്ല. എന്നാൽ ആഴ്ചകൾ കഴിഞ്ഞിട്ടും മാറാത്ത ഇത്തരം ലക്ഷണങ്ങൾക്ക് പിന്നിൽ ഒളിഞ്ഞിരിക്കുന്നത് നിങ്ങളുടെ ജീവന് തന്നെ ഭീഷണിയായേക്കാവുന്ന ‘ഹെഡ് ആൻഡ് നെക്ക്’ (തലയിലെയും കഴുത്തിലെയും) ക്യാൻസറുകൾ ആകാം. ഇന്ത്യയിൽ അതിവേഗം വർധിച്ചുവരുന്ന മാരകമായ ഈ അർബുദത്തെ പ്രാരംഭ ഘട്ടത്തിൽ തന്നെ തിരിച്ചറിയുകയും കൃത്യമായ വൈദ്യസഹായം തേടുകയും ചെയ്യേണ്ടത് ജീവിതം തിരിച്ചുപിടിക്കാൻ അത്യന്താപേക്ഷിതമാണ്.
വായ, തൊണ്ട, സ്വനപേടം (ല larynx), മൂക്ക്, സൈനസുകൾ, ഉമിനീർ ഗ്രന്ഥികൾ എന്നിവയുൾപ്പെടുന്ന തലയിലെയും കഴുത്തിലെയും വിവിധ ഭാഗങ്ങളെ ബാധിക്കുന്ന ക്യാൻസറുകളെയാണ് പൊതുവായി ഹെഡ് ആൻഡ് നെക്ക് ക്യാൻസറുകൾ എന്ന് വിളിക്കുന്നത്. ലോകാരോഗ്യ സംഘടനയുടെയും (WHO) അന്താരാഷ്ട്ര ക്യാൻസർ ഗവേഷണ ഏജൻസിയുടെയും (IARC) കണക്കുകൾ പ്രകാരം, ഇന്ത്യയിൽ ഏറ്റവും കൂടുതൽ കണ്ടുവരുന്ന അർബുദങ്ങളിൽ ഒന്നാണ് വായയെയും ചുണ്ടുകളെയും ബാധിക്കുന്ന ക്യാൻസറുകൾ. നമ്മുടെ രാജ്യത്ത് പുരുഷന്മാരിൽ കാണപ്പെടുന്ന ആകെ ക്യാൻസർ കേസുകളിൽ ഏകദേശം 26 ശതമാനവും ഹെഡ് ആൻഡ് നെക്ക് ക്യാൻസറുകളാണ്. ഇതിൽ ഏറ്റവും പ്രധാനപ്പെട്ട വില്ലൻ ജീവിതശൈലിയിലെ ചില ദുശ്ശീലങ്ങൾ തന്നെയാണ്. പുകയിലയുടെ ഉപയോഗം, പുകയില്ലാത്ത പുകയില ഉൽപന്നങ്ങൾ (പാൻമസാലകൾ), വെറ്റില മുറുക്ക്, അമിതമായ മദ്യപാനം എന്നിവയാണ് ഈ ക്യാൻസറിലേക്ക് നയിക്കുന്ന പ്രധാന ഘടകങ്ങൾ. ഇതിനുപുറമേ, ചെറുപ്പക്കാരിൽ തൊണ്ടയെ ബാധിക്കുന്ന ക്യാൻസറുകൾക്ക് പിന്നിൽ ‘ഹ്യൂമൻ പാപ്പിലോമ വൈറസ്’ (HPV) അണുബാധയും ഒരു പ്രധാന കാരണമായി ഇന്ന് ഉയർന്നുവരുന്നുണ്ട്.
പലപ്പോഴും രോഗലക്ഷണങ്ങൾ പ്രകടമായിട്ടും സാധാരണ അസുഖങ്ങളാണെന്ന് കരുതി ചികിത്സ വൈകിക്കുന്നതാണ് രോഗിയെ കൂടുതൽ അപകടത്തിലേക്ക് തള്ളിവിടുന്നത്. മൂന്നോ നാലോ ആഴ്ചകൾ കഴിഞ്ഞിട്ടും ഉണങ്ങാത്ത വായ്പ്പുണ്ണുകൾ അല്ലെങ്കിൽ വായിലെ മുറിവുകൾ, വിട്ടുമാറാത്ത കടുത്ത തൊണ്ടവേദന, ആഹാരസാധനങ്ങൾ വിഴുങ്ങാനുള്ള ബുദ്ധിമുട്ട് എന്നിവ ഈ രോഗത്തിന്റെ പ്രാരംഭ ലക്ഷണങ്ങളാകാം. ഇതുകൂടാതെ കഴുത്തിൽ ഉണ്ടാകുന്ന വേദനയില്ലാത്ത മുഴകൾ, ശബ്ദത്തിൽ പെട്ടെന്നുണ്ടാകുന്നതും ദീർഘനാൾ നീണ്ടുനിൽക്കുന്നതുമായ മാറ്റം അല്ലെങ്കിൽ ഇടർച്ച, വായ പൂർണ്ണമായി തുറക്കാനുള്ള പ്രയാസം, മോണയിൽ നിന്നും വായിൽ നിന്നും അകാരണമായി ചോര പൊടിയുക എന്നിവയും ഒട്ടും അവഗണിക്കാൻ പാടില്ലാത്ത ലക്ഷണങ്ങളാണ്. ചിലരിൽ മുഖത്തോ താടിയെല്ലിലോ ഉണ്ടാകുന്ന വീക്കം, ചെവിവേദന, മൂക്കിൽ നിന്നുള്ള രക്തസ്രാവം എന്നിവയും ഇതിന്റെ ഭാഗമായി കണ്ടുവരാറുണ്ട്.
ഇന്ത്യയിലെ ക്യാൻസർ ബാധിതരിൽ 60 മുതൽ 80 ശതമാനം ആളുകളും രോഗം അതിന്റെ സങ്കീർണ്ണമായ അവസ്ഥയിൽ എത്തിയ ശേഷമാണ് ആശുപത്രികളിൽ ചികിത്സയ്ക്കായി എത്തുന്നത്. ഇത് രോഗശമനത്തിനുള്ള സാധ്യതകളെയും അതിജീവന നിരക്കിനെയും ഗണ്യമായി കുറയ്ക്കുന്നു. തുടക്കത്തിൽ തന്നെ രോഗം കണ്ടെത്തിയാൽ ശസ്ത്രക്രിയ, റേഡിയേഷൻ തെറാപ്പി, കീമോതെറപ്പി, ഇമ്മ്യൂണോതെറപ്പി തുടങ്ങിയ അത്യാധുനിക ചികിത്സാ രീതികളിലൂടെ ഈ രോഗത്തെ പൂർണ്ണമായും ഭേദമാക്കാൻ സാധിക്കും. അതിനാൽ മുകളിൽ പറഞ്ഞിരിക്കുന്ന ലക്ഷണങ്ങളിൽ ഏതെങ്കിലും മൂന്നാഴ്ചയിൽ കൂടുതൽ നീണ്ടുനിൽക്കുകയാണെങ്കിൽ, സ്വയം ചികിത്സയ്ക്ക് മുതിരാതെ ഒരു ഓങ്കോളജിസ്റ്റിനെയോ ഇ.എൻ.ടി വിദഗ്ദ്ധനെയോ കണ്ട് കൃത്യമായ പരിശോധനകൾ നടത്തേണ്ടത് ജീവൻ രക്ഷിക്കാൻ അനിവാര്യമാണ്.
