ഉറക്കം കുറയുന്നത് ആരോഗ്യത്തിന് ഹാനികരമാണെന്ന വസ്തുത എല്ലാവർക്കും അറിയാമെങ്കിലും, എട്ട് മുതൽ പത്ത് മണിക്കൂറിലധികം അമിതമായി ഉറങ്ങുന്നതും ശരീരത്തിന് ദോഷകരമാണെന്ന് പ്രമുഖ അന്താരാഷ്ട്ര ശാസ്ത്ര മാസികയായ നേച്ചറിൽ പ്രസിദ്ധീകരിച്ച പുതിയ പഠനം വ്യക്തമാക്കുന്നു. കൊളംബിയ സർവകലാശാലയിലെ ഗവേഷകർ അഞ്ച് ലക്ഷത്തോളം ആളുകളുടെ ആരോഗ്യ വിവരങ്ങൾ മെഷീൻ ലേണിംഗ് മോഡലുകളുടെ സഹായത്തോടെ പരിശോധിച്ചാണ് ഈ കണ്ടെത്തലിലേക്ക് എത്തിയത്.
രാത്രിയിൽ ശരാശരി 6.4 മുതൽ 7.8 മണിക്കൂർ വരെ ഉറങ്ങുന്നവരിലാണ് ഏറ്റവും മികച്ച ജൈവിക ആയുസ്സും ആരോഗ്യകരമായ വാർദ്ധക്യ പ്രക്രിയയും കാണപ്പെടുന്നത്. എന്നാൽ ഈ പരിധിയിൽ കുറവോ കൂടുതലോ ഉറങ്ങുന്നവരിൽ തലച്ചോറ്, ഹൃദയം, ശ്വാസകോശം, പ്രതിരോധ സംവിധാനം എന്നിവയുൾപ്പെടെയുള്ള അവയവങ്ങളിൽ തന്മാത്രാ തലത്തിൽ ജൈവിക വാർദ്ധക്യം വളരെ വേഗത്തിലാകുന്നതായി കണ്ടെത്തി.
കുറഞ്ഞ ഉറക്കം വിഷാദം, അമിതവണ്ണം, പ്രമേഹം, ഹൃദ്രോഗങ്ങൾ എന്നിവയിലേക്ക് നയിക്കുമ്പോൾ, അമിത ഉറക്കം പലപ്പോഴും ശരീരത്തിലെ മറ്റ് ഗുരുതര രോഗങ്ങളുടെ ലക്ഷണമാകാനാണ് സാധ്യതയെന്ന് ഹൈദരാബാദ് അപ്പോളോ ആശുപത്രിയിലെ സീനിയർ ന്യൂറോളജിസ്റ്റ് ഡോ. സുധീർ കുമാർ വിശദീകരിക്കുന്നു. സ്ലീപ് അപ്നിയ, അൽഷിമേഴ്‌സ്, പാർക്കിൻസൺസ്, ക്രോണിക് ഇൻഫ്ലമേഷൻ തുടങ്ങിയ അവസ്ഥകളാണ് ആളുകളിൽ കൂടുതൽ സമയം ഉറങ്ങാനുള്ള പ്രവണത ഉണ്ടാക്കുന്നത്.
ഉറങ്ങുന്ന സമയദൈർഘ്യത്തേക്കാൾ ഉറക്കത്തിന്റെ ഗുണനിലവാരത്തിനാണ് പ്രാധാന്യം നൽകേണ്ടതെന്നും, എഴുന്നേൽക്കുമ്പോൾ ശരീരം എത്രത്തോളം ഊർജ്ജസ്വലമാണ് എന്നതിലാണ് കാര്യമെന്നും വിദഗ്ദ്ധർ ചൂണ്ടിക്കാട്ടുന്നു. വ്യായാമവും നല്ല ഭക്ഷണക്രമവും ശീലിച്ചാലും ഉറക്കം ക്രമമല്ലെങ്കിൽ അത് പേശികളുടെ വീണ്ടെടുപ്പിനെയും ശാരീരികക്ഷമതയെയും സാരമായി ബാധിക്കുമെന്ന് ഫിറ്റ്നസ് രംഗത്തെ വിദഗ്ദ്ധരും വ്യക്തമാക്കുന്നു. ഉറക്കവും ഉണരുന്ന സമയവും കൃത്യമായി പാലിക്കുക,
കിടക്കുന്നതിന് ഒരു മണിക്കൂർ മുൻപ് ഫോൺ സ്ക്രീനുകൾ ഒഴിവാക്കുക, പ്രഭാത വെയിൽ കൊള്ളുക, രാത്രി വൈകി കഫീനും കനത്ത ഭക്ഷണങ്ങളും ഒഴിവാക്കുക എന്നിവയാണ് ആരോഗ്യകരമായ ഉറക്കത്തിനായി വിദഗ്ദ്ധർ നിർദ്ദേശിക്കുന്ന പ്രധാന മാർഗ്ഗങ്ങൾ.
