ആയുർദൈർഘ്യത്തിന്റെ കാര്യത്തിൽ വീണ്ടും ലോകത്തെ ഞെട്ടിച്ച് ജപ്പാൻ. രാജ്യത്ത് 100 വയസ്സോ അതിൽ കൂടുതലോ പ്രായമുള്ളവരുടെ എണ്ണം ചരിത്രത്തിലാദ്യമായി ഒരു ലക്ഷം കടന്നതായി ജപ്പാൻ ആരോഗ്യ മന്ത്രാലയം പുറത്തുവിട്ട ഔദ്യോഗിക കണക്കുകൾ വ്യക്തമാക്കുന്നു. നിലവിൽ 1,07,677 പേരാണ് ജപ്പാനിൽ നൂറടിച്ച് ജീവിക്കുന്നത്. ലോകത്തിൽ വയോധികരുടെ ആധിക്യം കൊണ്ടും ദീർഘായുസ്സുളളവരുടെ എണ്ണം കൊണ്ടും ഒന്നാമതുള്ള രാജ്യമാണ് ജപ്പാൻ.
നൂറ് വയസ്സ് തികഞ്ഞവരിൽ ഭൂരിഭാഗവും സ്ത്രീകളാണെന്നതാണ് മറ്റൊരു ശ്രദ്ധേയമായ കാര്യം; ആകെ ശതാബ്ദി പിന്നിട്ടവരിൽ 88 ശതമാനവും സ്ത്രീകളാണ്. ക്യോട്ടോയിൽ നിന്നുള്ള 114 വയസ്സുകാരി ഫുയോ കിഷിമോട്ടോ ആണ് ജപ്പാനിലെ നിലവിലെ ഏറ്റവും പ്രായം കൂടിയ സ്ത്രീ. കുമാമോട്ടോ സ്വദേശിയായ 112 വയസ്സുകാരൻ ഹികാരു കാറ്റോ ആണ് ഏറ്റവും പ്രായമേറിയ പുരുഷൻ. 1963-ൽ ജപ്പാൻ ആദ്യമായി ഈ കണക്കെടുപ്പ് ആരംഭിച്ചപ്പോൾ രാജ്യത്ത് ആകെ 153 പേർ മാത്രമായിരുന്നു നൂറ് തികച്ചവർ. എന്നാൽ 1981-ൽ ഇത് ആയിരമായും 1998-ൽ പതിനായിരമായും കുത്തനെ ഉയരുകയായിരുന്നു.
കടൽമത്സ്യങ്ങൾ, ശുദ്ധമായ പച്ചക്കറികൾ, ഫൈബർ അടങ്ങിയ ഭക്ഷണങ്ങൾ എന്നിവ ഉൾപ്പെടുത്തിയ കൊഴുപ്പ് കുറഞ്ഞ പരമ്പരാഗത ഭക്ഷണരീതിയും, ലളിതമായ ശാരീരിക വ്യായാമങ്ങൾ ദിനചര്യയാക്കിയ ജീവിതരീതിയുമാണ് ജാപ്പനീസ് ജനതയുടെ ദീർഘായുസ്സിന് പിന്നിലെ പ്രധാന രഹസ്യമെന്ന് ആരോഗ്യ വിദഗ്ധർ വിലയിരുത്തുന്നു. ജപ്പാനിലെ മികച്ച വൈദ്യശാസ്ത്ര പുരോഗതിയും സാർവത്രിക ആരോഗ്യ പരിരക്ഷാ സംവിധാനങ്ങളും വയോജനങ്ങളുടെ ആയുസ്സ് കൂട്ടാൻ സഹായിക്കുന്നുണ്ട്.
എന്നാൽ, ആയുർദൈർഘ്യം ഉയരുന്നത് ജപ്പാനെ സംബന്ധിച്ചിടത്തോളം വലിയൊരു സാമൂഹിക-സാമ്പത്തിക വെല്ലുവിളി കൂടിയാണ്. രാജ്യത്തെ ജനനനിരക്ക് ഭയപ്പെടുത്തുന്ന രീതിയിൽ താഴേക്ക് പതിക്കുന്നതിനിടെ വയോജനങ്ങളുടെ എണ്ണം കൂടുന്നത് രാജ്യത്തിന്റെ പെൻഷൻ, ആരോഗ്യ ബജറ്റുകൾക്ക് കനത്ത ഭാരമാകുന്നു. നിലവിൽ ജപ്പാനിലെ ആകെ ജനസംഖ്യയുടെ 30 ശതമാനത്തോളം പേരും 65 വയസ്സോ അതിൽ കൂടുതലോ പ്രായമുള്ളവരാണ്. യുവാക്കളുടെ എണ്ണം കുറയുന്നത് ഭാവിയിൽ വൻ തൊഴിൽക്ഷാമത്തിനും സാമ്പത്തിക മാന്ദ്യത്തിനും വഴിയൊരുക്കുമെന്ന ആശങ്കയിലാണ് ജാപ്പനീസ് ഭരണകൂടം.
