രസഗുളയാണെന്ന് പറഞ്ഞ് അയൽവാസി നൽകിയ നാടൻ ബോംബ് വായിലിട്ട് കടിച്ച യുവാവിന് ദാരുണാന്ത്യം. മധ്യപ്രദേശിലെ ഡിൻഡോരി ജില്ലയിലാണ് മനസാക്ഷിയെ ഞെട്ടിച്ച കൊലപാതകം നടന്നിരിക്കുന്നത്. പഡാരിയ ഛാന്ത ഗ്രാമത്തിലെ രാജേന്ദ്ര ബറൗട്ടിയ (35) ആണ് കൊല്ലപ്പെട്ടത്. സംഭവത്തിൽ അയൽവാസിയായ രാമഭഗത് ബറൗട്ടിയയെ പോലീസ് അറസ്റ്റ് ചെയ്തു.
ചൊവ്വാഴ്ച രാത്രി എട്ട് മണിയോടെയാണ് നാടിനെ നടുക്കിയ ഈ സംഭവം ഉണ്ടായത്. അത്താഴത്തിന് ശേഷം രാജേന്ദ്രയും കുടുംബവും വീടിന്റെ മുറ്റത്ത് തീകാഞ്ഞിരിക്കുമ്പോഴാണ് അയൽവാസിയായ രാമഭഗത് അവിടേക്ക് എത്തിയത്. തുടർന്ന് ഇരുവരും തമ്മിൽ സംസാരിക്കുന്നതിനിടെ, തന്റെ കൈവശമുണ്ടായിരുന്ന ഒരു പലഹാരം രസഗുളയാണെന്ന് പറഞ്ഞ് രാമഭഗത് രാജേന്ദ്രയ്ക്ക് കഴിക്കാൻ നൽകുകയായിരുന്നു.
മധുരപലഹാരമാണെന്ന് വിശ്വസിച്ച് രാജേന്ദ്ര ഇത് വാങ്ങി വായിലിട്ട് കടിച്ചതും വലിയ ശബ്ദത്തോടെ പൊട്ടിത്തെറിക്കുകയായിരുന്നു. കാട്ടുപന്നികളെ വേട്ടയാടാൻ ഉപയോഗിക്കുന്ന നാടൻ സ്ഫോടകവസ്തുവാണ് (Country-made explosive) രസഗുളയുടെ രൂപത്തിൽ പ്രതി നൽകിയതെന്ന് ഡിൻഡോരി കോട്‌വാലി ഇൻസ്പെക്ടർ ദുർഗ പ്രസാദ് നാഗ്പുരെ വ്യക്തമാക്കി. സ്ഫോടനത്തിന്റെ ആഘാതത്തിൽ രാജേന്ദ്രയുടെ വായയ്ക്കും താടിയെല്ലിനും ഗുരുതരമായി പരിക്കേറ്റു.
ശബ്ദം കേട്ട് ഓടിയെത്തിയ കുടുംബാംഗങ്ങൾ ഉടൻ തന്നെ ഇദ്ദേഹത്തെ ഓട്ടോറിക്ഷയിൽ ഡിൻഡോരി ജില്ലാ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ചികിത്സയിലിരിക്കെ രാജേന്ദ്ര മരണത്തിന് കീഴടങ്ങുകയായിരുന്നു. മുൻവൈരാഗ്യമാണോ അതോ മറ്റെന്തെങ്കിലും കാരണങ്ങളാണോ കൊലപാതകത്തിലേക്ക് നയിച്ചതെന്ന കാര്യം പോലീസ് അന്വേഷിച്ചുവരികയാണ്.
പ്രതിയായ രാമഭഗത്തിനെതിരെ ഭാരതീയ ന്യായ സംഹിത (BNS) സെക്ഷൻ 105 (നരഹത്യ), സ്ഫോടകവസ്തു നിയമത്തിലെ 3, 4 വകുപ്പുകൾ എന്നിവ പ്രകാരം പോലീസ് കേസെടുത്തിട്ടുണ്ട്. കാട്ടുപന്നികളെ കൊല്ലാനായി ഉപയോഗിക്കുന്ന ഇത്തരം സ്ഫോടകവസ്തുക്കൾ ഏതെങ്കിലും തരത്തിലുള്ള സമ്മർദ്ദമേൽക്കുകയോ കടിക്കുകയോ ചെയ്യുമ്പോൾ അതീവ തീവ്രതയോടെ പൊട്ടിത്തെറിക്കുന്നവയാണ്. ഗ്രാമത്തിൽ ഇത്തരം മാരകമായ വസ്തുക്കൾ എങ്ങനെ എത്തിയെന്നതിനെക്കുറിച്ചും പോലീസ് വിശദമായ അന്വേഷണം ആരംഭിച്ചിട്ടുണ്ട്.
