തിരുവനന്തപുരം: സംസ്ഥാനത്ത് ഉടൻ ബസ് ചാർജ് വർദ്ധനവുണ്ടാകില്ലെന്ന് ഗതാഗത മന്ത്രി സി.പി. ജോൺ വ്യക്തമാക്കി. നിരക്ക് വർദ്ധിപ്പിക്കണമെന്ന സ്വകാര്യ ബസ് ഉടമകളുടെ ദീർഘകാല ആവശ്യം തള്ളിയ മന്ത്രി, വിദ്യാർത്ഥികളുടെ യാത്രാ കൺസഷൻ നിരക്കിലും യാതൊരുവിധ വർദ്ധനവുമുണ്ടാകില്ലെന്ന് ഉറപ്പുനൽകി. എന്നാൽ, നിരക്ക് വർദ്ധനവ് ഒഴികെയുള്ള ബസ് ഉടമകളുടെ മറ്റ് ന്യായമായ ആവശ്യങ്ങൾ സർക്കാർ അനുഭാവപൂർവ്വം പരിഗണിക്കുമെന്നും അദ്ദേഹം അറിയിച്ചു.
ബസ് നിരക്ക് വർദ്ധിപ്പിക്കുന്ന കാര്യം നിലവിൽ സർക്കാരിന്റെ അജണ്ടയിലില്ലെന്ന് മന്ത്രി പറഞ്ഞു. ബസ് ഉടമകളിൽ തന്നെ ഒരു വിഭാഗം ചാർജ് വർദ്ധനവിന് എതിരാണെന്നാണ് സർക്കാരിന്റെ വിലയിരുത്തൽ. നിരക്ക് കൂട്ടിയാൽ സാധാരണക്കാരായ യാത്രക്കാർ ബസ് യാത്ര ഉപേക്ഷിച്ച് ഇരുചക്രവാഹനങ്ങൾ ഉൾപ്പെടെയുള്ള സ്വകാര്യ വാഹനങ്ങളിലേക്ക് മാറുമെന്നും, ഇത് നിലവിലുള്ള യാത്രക്കാരുടെ എണ്ണം വീണ്ടും കുറയ്ക്കുമെന്നും ഒരു വിഭാഗം ഉടമകൾ ഭയപ്പെടുന്നുണ്ട്. സംസ്ഥാനത്ത് നേരത്തെ മുപ്പതിനായിരത്തോളം സ്വകാര്യ ബസുകൾ സർവീസ് നടത്തിയിരുന്ന സ്ഥാനത്ത് നിലവിൽ അത് എണ്ണായിരമായി ചുരുങ്ങിയതായും മന്ത്രി ചൂണ്ടിക്കാട്ടി.
അതേസമയം, സംസ്ഥാനത്തെ ഓട്ടോ-ടാക്സി നിരക്കുകൾ വർദ്ധിപ്പിക്കണമെന്നാണ് സർക്കാരിന്റെയും അഭിപ്രായമെന്ന് സി.പി. ജോൺ വ്യക്തമാക്കി. 2022-ലാണ് അവസാനമായി ഓട്ടോ, ടാക്സി നിരക്കുകൾ പരിഷ്കരിച്ചതെന്നും, ഇന്ധനവിലയും മറ്റ് ചെലവുകളും വർദ്ധിച്ച സാഹചര്യത്തിൽ ഇവരുടെ നിരക്ക് കൂട്ടുന്നതിനോട് സർക്കാരിന് അനുകൂല നിലപാടാണുള്ളതെന്നും മന്ത്രി വിശദീകരിച്ചു.
സംസ്ഥാനത്ത് വർദ്ധിച്ചുവരുന്ന വാഹനാപകടങ്ങളുടെ പശ്ചാത്തലത്തിൽ കർശന മുന്നറിയിപ്പും മന്ത്രി നൽകി. പ്രായപൂർത്തിയാകാത്ത കുട്ടികളും കൗമാരക്കാരും പ്രതികളാകുന്ന വാഹനാപകടങ്ങളിൽ രക്ഷിതാക്കൾ ഉത്തരവാദിത്തം ഏറ്റെടുത്തേ മതിയാകൂ എന്ന് സി.പി. ജോൺ പറഞ്ഞു. മക്കൾ വാഹനമെടുത്തത് തങ്ങൾ അറിഞ്ഞിരുന്നില്ലെന്ന ന്യായം പറഞ്ഞ് മാതാപിതാക്കൾക്ക് നിയമനടപടികളിൽ നിന്ന് ഒഴിഞ്ഞുമാറാനാകില്ല. വാഹന ഉടമയെന്ന നിലയിൽ രക്ഷിതാക്കൾക്കെതിരെ കർശന നടപടിയും ശിക്ഷയും ഉറപ്പാക്കണം. ഇതിനുപുറമെ, മദ്യപിച്ച് വാഹനമോടിക്കുന്നവർക്കെതിരെയുള്ള നിലവിലെ ശിക്ഷാനടപടികൾ കൂടുതൽ കടുപ്പിക്കണമെന്നും മന്ത്രി കൂട്ടിച്ചേർത്തു.
