കൊല്ലം: എട്ടാം ക്ലാസ് വിദ്യാർഥിയെ വിവസ്ത്രനാക്കി ക്രൂരമായി മർദിച്ച സംഭവത്തിൽ അമ്മയുടെ പങ്കാളിയെ പൊലീസ് അറസ്റ്റ് ചെയ്തു. ചടയമംഗലം സ്വദേശിയായ രാജേഷാണ് പിടിയിലായത്. മദ്യലഹരിയിലായിരുന്ന പ്രതി കുട്ടിയെ ക്രൂരമായി മർദിക്കുന്നതിന്റെ ദൃശ്യങ്ങൾ പുറത്തുവന്നതോടെയാണ് മനസാക്ഷിയെ ഞെട്ടിക്കുന്ന ഈ സംഭവം പുറംലോകമറിഞ്ഞത്.
രാജേഷിന് കുട്ടിയെ ഒട്ടും ഇഷ്ടമായിരുന്നില്ലെന്നും മദ്യപിച്ചെത്തുന്ന ദിവസങ്ങളിലെല്ലാം കുട്ടിയെ ക്രൂരമായി ഉപദ്രവിക്കാറുണ്ടെന്നും അമ്മ ശാലിനി പൊലീസിന് മൊഴി നൽകി. സ്ഥിരമായി കുട്ടിയെ അസഭ്യം പറയുകയും മാനസികമായും ശാരീരികമായും പീഡിപ്പിക്കുകയും ചെയ്യുന്നത് ഇയാളുടെ പതിവായിരുന്നുവെന്നും ശാലിനി വ്യക്തമാക്കി. മർദന ദൃശ്യങ്ങൾ പ്രചരിച്ചതിന് പിന്നാലെ ചടയമംഗലം പൊലീസ് നടത്തിയ അന്വേഷണത്തിലാണ് പ്രതിയെ കസ്റ്റഡിയിലെടുത്തത്. ബാലനീതി നിയമത്തിലെ വിവിധ വകുപ്പുകൾ പ്രകാരമാണ് പ്രതിക്കെതിരെ കേസെടുത്തിരിക്കുന്നത്.
അതേസമയം, സംഭവത്തിൽ സംസ്ഥാന ബാലാവകാശ കമ്മിഷൻ സ്വമേധയാ കേസെടുത്തു. മാധ്യമവാർത്തകളുടെ അടിസ്ഥാനത്തിലാണ് കമ്മിഷന്റെ അടിയന്തര ഇടപെടൽ. സംഭവത്തെക്കുറിച്ച് വിശദമായ അന്വേഷണം നടത്തി റിപ്പോർട്ട് സമർപ്പിക്കാൻ കൊല്ലം റൂറൽ എസ്പി, ചടയമംഗലം എസ്എച്ച്ഒ, ജില്ലാ ശിശു സംരക്ഷണ ഓഫിസർ എന്നിവരോട് കമ്മിഷൻ വിശദീകരണം തേടിയിട്ടുണ്ട്. നിലവിൽ കുട്ടിക്ക് ആവശ്യമായ കൗൺസിലിംഗും സംരക്ഷണവും ഉറപ്പാക്കാൻ ശിശുക്ഷേമ സമിതിയും നടപടികൾ ആരംഭിച്ചു.
