ന്യൂഡൽഹി: പശ്ചിമേഷ്യയിലെ സംഘർഷത്തെ തുടർന്ന് രാജ്യത്ത് ഡീസൽ വില ലീറ്ററിന് 7 രൂപ വർധിപ്പിച്ചതിൽ നിർണായക വെളിപ്പെടുത്തലുമായി പ്രധാനമന്ത്രി നരേന്ദ്ര മോദി. ആഗോള വിപണിയിലെ സാഹചര്യമനുസരിച്ച് ഡീസൽ വില ലീറ്ററിന് 50 രൂപയെങ്കിലും കൂട്ടേണ്ടതായിരുന്നുവെന്നും, എന്നാൽ ജനങ്ങളെയും കർഷകരെയും ബാധിക്കാതിരിക്കാൻ 43 രൂപയുടെ അധിക ബാധ്യത കേന്ദ്ര സർക്കാർ സ്വയം ഏറ്റെടുക്കുകയായിരുന്നുവെന്നും പ്രധാനമന്ത്രി വ്യക്തമാക്കി. ന്യൂഡൽഹി ഭാരത് മണ്ഡപത്തിൽ നടന്ന ഇന്ത്യാ ടുഡേ ഗ്രൂപ്പിന്റെ ‘കിസാൻ തക് ഭാരത് അഗ്രികൾച്ചർ കോൺഫറൻസിൽ’ സംസാരിക്കുകയായിരുന്നു അദ്ദേഹം.
പശ്ചിമേഷ്യൻ സംഘർഷം രൂക്ഷമായതോടെ ഏതാനും ആഴ്ചകൾക്കുള്ളിൽ അസംസ്കൃത എണ്ണവില ബാരലിന് 70 ഡോളറിൽ നിന്ന് 122 ഡോളറിലേക്കാണ് കുതിച്ചുയർന്നത്. ഇത് ഇന്ത്യയ്ക്ക് മുന്നിൽ വലിയ സാമ്പത്തിക വെല്ലുവിളിയാണ് ഉയർത്തിയത്. ഈ സാഹചര്യത്തിൽ ഡീസൽ വില ലീറ്ററിന് കുറഞ്ഞത് 50 രൂപയെങ്കിലും വർധിപ്പിക്കേണ്ടി വരുമായിരുന്നു. എന്നാൽ, അന്താരാഷ്ട്ര വിപണിയിലെ വിലക്കയറ്റത്തിന്റെ പൂർണഭാരം സാധാരണക്കാരിലേക്കും കർഷകരിലേക്കും അടിച്ചേൽപ്പിക്കേണ്ടതില്ലെന്ന് സർക്കാർ തീരുമാനിക്കുകയായിരുന്നു.ഇതോടെയാണ് റീട്ടെയ്ൽ വിലവർധന 7 രൂപയായി ചുരുങ്ങിയതെന്ന് മോദി വിശദീകരിച്ചു.
ഇത്തരത്തിൽ 43 രൂപയുടെ ബാധ്യത ഏറ്റെടുത്തതിലൂടെ കേന്ദ്ര സർക്കാരിന് ഓരോ മാസവും ഏകദേശം 14,000 കോടി രൂപയുടെ നഷ്ടമാണ് സംഭവിക്കുന്നതെന്നും പ്രധാനമന്ത്രി വെളിപ്പെടുത്തി. അയൽരാജ്യങ്ങളിൽ ഇന്ധനവില 40 മുതൽ 50 ശതമാനം വരെ വർധിച്ചപ്പോഴും ഇന്ത്യയിൽ ചെറിയൊരു വർധന മാത്രമാണ് വരുത്തിയത്. കഴിഞ്ഞ മേയിലായിരുന്നു പൊതുമേഖലാ എണ്ണവിതരണ കമ്പനികൾ പെട്രോൾ, ഡീസൽ വിലയിൽ ശരാശരി 7 രൂപയുടെ വർധനവ് വരുത്തിയത്.ഇതനുസരിച്ച് തിരുവനന്തപുരത്ത് നിലവിൽ ഡീസൽ വില ലീറ്ററിന് 104.40 രൂപയും പെട്രോൾ വില 115.49 രൂപയുമാണ്.
കർഷകരുടെ താൽപ്പര്യങ്ങൾക്കാണ് സർക്കാർ എപ്പോഴും പ്രഥമ പരിഗണന നൽകുന്നതെന്ന് പ്രധാനമന്ത്രി ആവർത്തിച്ചു.കഴിഞ്ഞ 12 വർഷത്തെ ഭരണകാലയളവിൽ കർഷകർക്ക് കുറഞ്ഞ നിരക്കിൽ വളം ലഭ്യമാക്കുന്നതിനായി മാത്രം 16 ലക്ഷം കോടി രൂപയാണ് കേന്ദ്രം ചെലവഴിച്ചതെന്നും അദ്ദേഹം ചൂണ്ടിക്കാട്ടി. ആഗോള വിപണിയിൽ 5,000 രൂപയോളം വിലവരുന്ന ഒരു ചാക്ക് ഡിഎപി വളം ഇന്ത്യയിലെ കർഷകർക്ക് 1,300 രൂപയ്ക്കും, 3,000 രൂപ വിലവരുന്ന യൂറിയ 300 രൂപയിൽ താഴെ നിരക്കിലുമാണ് ലഭ്യമാക്കുന്നതെന്നും മോദി കൂട്ടിച്ചേർത്തു. കർഷകരെ ശാക്തീകരിക്കാതെ ‘വികസിത ഭാരതം’ സാധ്യമാകില്ലെന്നും സ്വാതന്ത്ര്യത്തിന് ശേഷം ആദ്യമായി കഴിഞ്ഞ ദശകത്തിൽ കാർഷിക മേഖല ശരാശരി നാല് ശതമാനത്തിലധികം വളർച്ച കൈവരിച്ചെന്നും പ്രധാനമന്ത്രി പറഞ്ഞു.
