ഐബി ഉദ്യോഗസ്ഥരുടെ മുഖത്തടിക്കാന്‍ തന്റഎ പഴയ ചെരിപ്പ് എടുത്തുവച്ചിട്ടുണ്ടെന്ന് ഐഎസ്ആര്‍ഒ മുന്‍ ശാസ്ത്രജ്ഞന്‍ നമ്പി നാരായണന്‍. നിരപരാധിയാണെന്നു തെളിഞ്ഞാല്‍ തന്റെ ചെരിപ്പുകൊണ്ട് തങ്ങളുടെ മുഖത്തടിക്കാമെന്നു പറഞ്ഞ ഇന്റലിജന്‍സ് ബ്യൂറോ ഉദ്യോഗസ്ഥരുണ്ടായിരുന്നു. ഇപ്പോള്‍ താന്‍ അവരെ എല്ലായിടത്തും തെരയുകയാണ്. പക്ഷേ, ആരെയും കാണാനില്ല. പഴയ ചെരിപ്പ് അവര്‍ക്കു വേണ്ടി താന്‍ സൂക്ഷിച്ചു വച്ചിട്ടുണ്ടെന്നും അദ്ദേഹം വാര്‍ത്താ സമ്മേളനത്തില്‍ പറഞ്ഞു.
ഈ കള്ളക്കേസിനു പിന്നില്‍ ഇന്റലിജന്‍സ് ബ്യൂറോയാണെന്നു തുറന്നു പറയേണ്ടത് അന്വേഷണ ഉദ്യോഗസ്ഥനായിരുന്ന സിബി മാത്യൂസാണ്. അദ്ദേഹം അതു പറയുമെന്നാണു പ്രതീക്ഷിക്കുന്നത്. പ്രതിയെ ആദ്യം കണ്ടെത്തിയശേഷം കുറ്റം തീരുമാനിക്കുകയും തെളിവുകള്‍ സൃഷ്ടിക്കുകയുമാണു ചാരക്കേസിലുണ്ടായതെന്നു നമ്പി നാരായണന്‍ പറഞ്ഞു.
മാനനഷ്ടത്തിന് അമ്പതു ലക്ഷം രൂപ നല്‍കാനുള്ള സുപ്രീം കോടതി വിധിയില്‍ ഏറെ സന്തോഷിക്കുന്നില്ല. ചാരനല്ലെന്ന വിളികേള്‍ക്കാനാണ് അതിലേറെ ആഗ്രഹിക്കുന്നതെന്നും അദ്ദേഹം വ്യക്തമാക്കി.
ചാരക്കേസില്‍ പത്രങ്ങള്‍ എഴുതിയതു വിവരക്കേടാണ്. തെറ്റിദ്ധരിപ്പിച്ച് മാധ്യമങ്ങളെ തെറ്റായ വഴിയിലേക്കു നയിക്കുകയായിരുന്നു എന്നും പത്രപ്രവര്‍ത്തക യൂണിയന്‍ സംഘടിപ്പിച്ച മുഖാമുഖം പരിപാടിയില്‍ അദ്ദേഹം പറഞ്ഞു.
Discussion about this post