മുഖ്യമന്ത്രി പിണറായി വിജയന് തന്നെ ശാസിക്കാനുള്ള അധികാരമുണ്ടെന്നും അദ്ദേഹം തന്റെ പാര്‍ട്ടിയുടെ നേതാവാണെന്നും ദേവസ്വം ബോര്‍ഡ് പ്രസിഡന്റ് എ.പത്മകുമാര്‍ വ്യക്തമാക്കി. താനും പിണറായി വിജയനുമായുള്ള ബന്ധം മുഖ്യമന്ത്രി-ദേവസ്വം ബോര്‍ഡ് പ്രസിഡന്റ് എന്ന രീതിയിലുള്ള ബന്ധമല്ലെന്നും അദ്ദേഹം പറഞ്ഞു.
തന്റെ കഴിവുകളും ദൗര്‍ബല്യങ്ങളും എന്താണെന്ന് അറിയാവുന്ന വ്യക്തിയാണ് പിണറായി വിജയനെന്നും അദ്ദേഹത്തിന് തന്നെ ശാസിക്കാനും തിരുത്താനുമുള്ള അധികാരമുണ്ടെന്നും പത്മകുമാര്‍ പറഞ്ഞു. മുഖ്യമന്ത്രി ശാസിച്ചിട്ടുണ്ടെങ്കില്‍ അത് പറയാന്‍ തനിക്ക് ബുദ്ധിമുട്ടില്ലെന്നും അദ്ദേഹം വ്യക്തമാക്കി. മുന്‍ കാലങ്ങളില്‍ ചില ദേവസ്വം ബോര്‍ഡ് പ്രസിഡന്റുമാര്‍ നേരിടേണ്ടി വന്ന ആരോപണങ്ങള്‍ തനിക്ക് നേരിടേണ്ടി വരില്ലെന്നും അദ്ദേഹം പറഞ്ഞു.
പഴുപ്പിച്ച് പഴുത്ത ഇലയാക്കി തന്നെ വീഴ്ത്താന്‍ ചിലര്‍ ശ്രമിച്ചുവെന്നും തന്റെ സ്ഥാനം നഷ്ടപ്പെട്ടാല്‍ സന്തോഷിക്കുന്ന ചിലരാണ് തന്റെ രാജിയെക്കുറിച്ച് വാര്‍ത്തകള്‍ പ്രചരിപ്പിച്ചതെന്നും അദ്ദേഹം പറഞ്ഞു. ഇവര്‍ ആരൊക്കെയെന്ന് താന്‍ വെളിപ്പെടുത്താനാഗ്രഹിക്കുന്നില്ലെന്നും അദ്ദേഹം പറഞ്ഞു.
Discussion about this post