എന്‍ഫോഴ്‌സ്‌മെന്റ് അന്വേഷണം നേരിടുന്ന കെപി യോഹന്നാന്‍ പ്രധാനമന്ത്രിയെ കണ്ടത് പി.ജെ കുര്യനൊപ്പം: യോഹന്നാന്റെ തട്ടിപ്പിനെ കുറിച്ച് അറിയില്ലായിരുന്നുവെന്ന് പി.ജെ കുര്യന്‍

ഡല്‍ഹി: കോടികളുടെ തിരിമറി നടത്തിയെന്ന് ആരോപണമുയര്‍ന്ന ആത്മീയ വ്യാപാരി കെ.പി യോഹന്നാന്‍ പ്രധാനമന്ത്രി നരേന്ദ്രമോദിയെ കണ്ടത് പി.ജെ കുര്യന്‍ മുഖാന്തിരം. കേരളത്തിലെ നിയമസഭ തെരഞ്ഞെടുപ്പില്‍ സഹകരിക്കാമെന്ന് മോദിയെ കണ്ട് ഉറപ്പ് നല്‍കാന്‍ എന്ന രീതിയില്‍ മോദിയെ കണ്ട യോഹന്നാനെ രാജ്യസഭ ഡെപ്യൂട്ടി സ്പീക്കര്‍ അകമ്പടി സേവിച്ചത് വിവാദങ്ങള്‍ക്ക് വഴിവച്ചു. പ്രതിപക്ഷത്തെ പ്രമുഖ നേതാവ് കൂടിയായ പി.ജെ കുര്യനൊപ്പം എത്തിയ അതിഥിയായത് കൊണ്ടാണ് നരേന്ദ്രമോദി യോഹന്നാനെ സ്വീകരിച്ചത്. കേരളത്തിലെ പ്രമുഖ ക്രൈസ്തവ സഭ വിശ്വാസികളുടെ പിന്തുണയുള്ള മതനേതാവ് എന്ന നിലയിലാണ് യോഹന്നാന്‍ മോദിയെ കാണുന്നതിനുള്ള അനുമതി തേടിയതെന്നാണ് വിവരം. യോഹന്നാനെതിരെ വിദേശ ഫണ്ട് തിരിമറി സംബന്ധിച്ച് എന്‍ഫോഴ്‌സ് മെന്റ് അന്വേഷണം നടക്കുന്ന കാര്യവും പി.ജെ കുര്യന്‍ മോദിയില്‍ നിന്ന് മറച്ചുവെച്ചുവെന്നാണ് ആരോപണം.
പി ജെ കുര്യനെ തെറ്റിദ്ധരിപ്പിച്ചാണ് കെ പി യോഹന്നാന്‍ മോഡിയുമായുള്ള കൂടികാഴ്ചക്ക് അവസരമോരുക്കിയത് എന്ന് പി ജെ കുര്യന്‍ ഒരു ഓണ്‍ലൈന്‍ ന്യൂസിന് നല്‍കിയ പ്രതികരണത്തില്‍ പറഞ്ഞു. ‘കെപി യോഹന്നാന്റെ തട്ടിപ്പുകള്‍ അറിഞ്ഞിരുന്നു എങ്കില്‍ ഇതിനു കൂട്ട് നില്‍ക്കില്ലായിരുന്നുവെന്നും പി.ജെ കുര്യന്‍ പ്രതികരിച്ചു.

യോഹന്നാന്‍ന്റെ ബിലീവേഴ്‌സ് ചര്‍ച്ച് ഓഫ് ഇന്ത്യക്ക്, ഇന്ത്യ ഒട്ടാകെ മുപ്പതു ലക്ഷം വിശ്വാസികള്‍ ഉണ്ട് എന്ന് കേന്ദ്ര ബിജെപി നേതൃത്വത്തോട് അവകാശപ്പെട്ടിരുന്നുവെന്നാണ് ലഭിക്കുന്ന സൂചന. ആവശ്യമെങ്കില്‍ കേരള നിയമ സഭ തിരഞ്ഞെടുപ്പില്‍ ബിലീവേഴ്‌സ് ചര്‍ച്ച് ഓഫ് ഇന്ത്യ എന്‍ഡിഎ സ്ഥാനാര്‍ത്ഥികള്‍ക്ക് വേണ്ടി വോട്ട് ചെയ്യും എന്നും അദ്ദേഹം ബിജെപി നേതൃത്വത്തിന് ഉറപ്പു ഇദ്ദേഹം ഉറപ്പുനല്‍കി.

അതേസമയം കേരളത്തില്‍ മൂവായിരത്തില്‍ താഴെ വിശ്വാസികള്‍ മാത്രമേ ഇപ്പോള്‍ യോഹന്നാന്റെ ബിലിവേഴ്‌സ് ചര്‍ച്ച് ഓഫ് ഇന്ത്യയ്ക്ക് ഉള്ളു എന്നാണ് ബിജെപി വൃത്തങ്ങള്‍ നല്‍കുന്ന വിശദീകരണം. കേസുമായി ബന്ധപ്പെട്ട കാര്യങ്ങള്‍ സംസാരിക്കാനോ, തെരഞ്ഞെടുപ്പ് സംബന്ധിച്ച് എന്തെങ്കിലും സംസാരിക്കാനോ അല്ല യോഹന്നാനും, പി.കെ കുര്യനും മോദിയെ കണ്ടത്. രാഷ്ട്രീയം സംസാരിക്കാന്‍ പ്രതിപക്ഷ കക്ഷി നേതാവുമായി പോയി എന്ന് പ്രചരിപ്പിക്കുന്നത് ശുദ്ധ അസംബദ്ധമാണെന്ന് എല്ലാവര്‍ക്കുമറിയാമെന്ന് ബിജെപി നേതാക്കള്‍ പറഞ്ഞു. പി.ജെ കുര്യേനൊപ്പം പോയി ഒരു ഫോട്ടോ എടുക്കുന്നതും സംസാരിച്ചതും വവാദമാക്കാന്‍ ശ്രമിക്കുന്നവരുടെ ഉദ്ദേശം എല്ലാവര്‍ക്കുമറിയാമെന്നും ബിജെപി വൃത്തങ്ങള്‍ പറയുന്നു.

കെപി .യോഹന്നാനുമായി ബന്ധപ്പെട്ട പരാതിയെ പറ്റി ഒരി ഓണ്‍ലൈന്‍ ന്യൂസ് നടത്തിയ അന്വേഷണം സംബന്ധിച്ച റിപ്പോര്‍ട്ട് പുറത്ത് വന്നിരുന്നു. ഈ അന്വേഷണ റിപ്പോര്‍ട്ടില്‍ കണ്ടെത്തി എന്ന് പറയുന്ന കാര്യങ്ങള്‍ ഇവയാണ്-

കോടികളുടെ തിരുമറിയാണ് കെ പി യോഹന്നാന്‍ തന്റെ ഗോസ്പല്‍ ഫോര്‍ ഏഷ്യ ഇന്‍കോര്‍പ്പറേറ്റഡ് എന്ന സ്ഥാപനം വഴി നടത്തിയത്. ഇന്ത്യയിലും അയല്‍ രാജ്യങ്ങളിലുമായ് 15000 കോടിയിലധികം രൂപയുടെ ലാന്‍ഡ് ബാങ്കിന് ഉടമയാണ് കെ പി യോഹന്നാന്‍.

ഗോസ്പല്‍ ഫോര്‍ ഏഷ്യ (ജിഎഫ്എ) ലാസ്റ്റ് അവര്‍ മിനിസ്ട്രി (എല്‍എച്ച്എം), ലൗ ഇന്ത്യ മിനിസ്ട്രീസ് (എല്‍ഐഎം) ഷക്കീന പ്രോഫറ്റിക് മിഷന്‍ ട്രസ്റ്റ് (എസ്പിഎംടി), റെഹാബോത് ഇന്ത്യന്‍ ജിപ്‌സി ന്യൂ ലൈഫ് ട്രസ്റ്റ് (ആര്‍ഐജിഎന്‍എല്‍ടി), ന്യൂ ഹോപ് ഫൗണ്ടേഷന്‍ (എന്‍എച്ച്എഫ്), ഹോളി സ്പിരിറ്റ് മിനിസ്ട്രീസ് (എച്ച്എസ്എം), ഗ്രോത്ത് ഇന്‍ ഫ്രാറ്റേനിറ്റി (ജിഐഎഫ്ടി) എന്നി സംഘടനകള്‍ വഴിയാണ് യോഹന്നാന്‍ തട്ടിപ്പുകള്‍ നടത്തുന്നത്. ഇന്ത്യയില്‍ പ്രവര്‍ത്തിക്കുന്ന കെ.പി.യോഹന്നാന്റെ എല്ലാ സംഘടനകളും എഫ്‌സിആര്‍എ പ്രകാരം വിദേശഫണ്ട് സ്വീകരിക്കുന്നവയാണ്. ഇതനുസരിച്ച് മുന്‍ നീക്കിയിരിപ്പ് ഉള്‍പ്പെടെ ഗോസ്പല്‍ ഫോര്‍ ഏഷ്യ, ബിലീവേഴ്‌സസ് ചര്‍ച്ച് ഓഫ് ഇന്ത്യ, ലാസ്റ്റ് അവര്‍ മിനിസ്ട്രി, ലൗ ഇന്ത്യ മിനിസ്ട്രീസ് എന്നീ എന്‍ജിഒകള്‍ക്ക് 201415 കാലയളവില്‍ 1191 കോടിയുടെ വിദേശഫണ്ട് നീക്കിയിരിപ്പുണ്ട്.

കെ പി യോഹന്നാന്റെ പ്രധാന വരുമാന മാര്‍ഗ്ഗമാണ് ഗോസ്പല്‍ ഫോര്‍ ഏഷ്യയുടെ ‘ബ്രിഡ്ജ് ഓഫ് ഹോപ്പ്’ പദ്ധതിയാണ്. ഈ പദ്ധതി വഴി വിദേശികള്‍ക്ക് കുട്ടികളുടെ വിദ്യാഭ്യാസം ഉള്‍പ്പടെയുള്ള സര്‍വ്വ ചിലവും സ്‌പോണ്‍സര്‍ ചെയ്യാവുന്നതാണ്. ഇങ്ങനെ സ്‌പോണ്‍സര്‍ ചെയ്യുന്നവര്‍ ഒരു കുട്ടിക്ക് ഒരു മാസം 300 ഡോളര്‍ ആണ് നല്‍കേണ്ടത്. ഇങ്ങനെ 67,000 കുട്ടികളുടെ സര്‍വ്വ ചിലവും ഗോസ്പല്‍ ഫോര്‍ ഏഷ്യ വഹിക്കുന്നു എന്നാണു ഇവര്‍ അവകാശപ്പെടുന്നത്. എന്നാല്‍ പതിനായിരത്തില്‍ താഴെ കുട്ടികളെ മാത്രമാണ് ഇങ്ങനെ സഹായമെത്തുന്നത് എന്നാണു അറിയാന്‍ കഴിഞ്ഞത്.

പല സ്‌പോന്‍സറന്‍മാരെയും കബളിപ്പിച്ചാണ് ഈ സഹായം നേടുന്നത്. സ്‌പോണ്‍സര്‍മാര്‍ക്ക് കുട്ടികള്‍ എഴുതുന്നു എന്ന വ്യാജേന കത്തുകള്‍ എഴുതാന്‍ വേണ്ടി മാത്രം അന്‍പതോളം വരുന്ന ഒരു സംഘം തന്നെ തിരുവല്ലയിലെ തിരുവല്ല ബിലീവേഴ്‌സ് ചര്ച്ച് ആസ്ഥാനത് ഉണ്ട്

ഇന്ത്യയില്‍ റെയില്‍വെ സ്റ്റേഷന്‍ ഉള്ള എല്ലാ സ്ഥലത്തും ബിലീവേഴ്‌സ് ചര്ച്ചിന് ആസ്തി വേണം എന്ന ജന്മാഭിലാഷം പൂര്‍ത്തിയാക്കുന്നതിലേക്ക് വേണ്ടിയാണ് കെ പി യോഹന്നാന്‍ ഈ പണം മുഴുവന്‍ ചിലവഴിക്കുന്നത്
മൂന്നു മെഡിക്കല്‍ കോളേജുകള്‍ നിലവിലുള്ള തിരുവല്ലയില്‍ 600 കോടി മുതല്‍മുടക്കി മരുമകന് വേണ്ടി മെഡിക്കല്‍ കോളേജ് ഈ പണം ഉയോഗിച്ച് നിര്‍മ്മിക്കുകയുണ്ടായി. ഫലഭൂയിഷ്ഠമായ നെല്‍ വയല്‍ നികത്തിയാണ് ഈ ഈ മെഡിക്കല്‍ കോളേജ് ഇദ്ദേഹം ഉണ്ടാക്കിയത്. ആ വിഷയങ്ങള്‍ ഒതുക്കിത്തീര്‍ക്കാന്‍ വേണ്ടി മാത്രം കോടികള്‍ ചിലവഴിക്കേണ്ടി വന്നു

2400 ഏക്കര്‍ ഉള്ള ചെറുവള്ളി എസ്റ്റേറ്റ്, കോട്ടയം ജില്ലയില്‍ വിനോദ സഞ്ചാര കേന്ദ്രമായ് വികസിപ്പിക്കാന്‍ വേണ്ടിയുള്ള240 ഏക്കര്‍ ഉള്ള ദ്വീപ്, എറണാകുളം ജില്ലയില്‍ നെടുമ്പാശ്ശേരി വിമാനത്താവളത്തിനു അടുത്തായ് ഉള്ള കോടികള്‍ വിലമതിക്കുന്ന 40 ഏക്കര്‍ സ്ഥലം, തുരുവല്ലയില്‍ ബിലീവേഴ്‌സ് ചര്‍ച്ച് ഓഫ് ഇന്ത്യയുടെ ആസ്ഥാനം ഉള്‍പ്പെടുന്ന 1700 ഏക്കര്‍ തോട്ടം, ഡല്‍ഹി ഗുഡ്ഗാവില്‍ 36 ഏക്കര്‍ സ്ഥലം, തമിഴ്‌നാട്ടില്‍ ശ്രീപേരൂമ്പത്തൂരിലെ ടെക് സിറ്റിയോട് ചേര്‍ന്ന് 40 ഏക്കര്‍, ഷില്ലോങ്ങില്‍ 300 ഏക്കര്‍, കല്‍ക്കട്ടയില്‍ 160 ഏക്കര്‍,അസ്സമിലെ ഗോഹട്ടിയില്‍ 40 ഏക്കര്‍, ലക്‌നവില്‍ 14 ഏക്കര്‍, മുംബൈയിലെ പനവേലില്‍ 20 ഏക്കര്‍, നേപ്പാളില്‍ നൂറുകണക്കിന് ഏക്കര്‍ ഭൂമി എന്നിവ കെ പി യോഹന്നാ്ന്‍ വാങ്ങികൂട്ടിയതായി നാരദാ ന്യൂസ് എന്ന ഓണ്‍ലൈന്‍ ന്യൂസ് പുറത്ത് വിട്ട റിപ്പോര്‍ട്ട് പറയുന്നു.

കേരളത്തില്‍ പ്രമുഖ സിപിഎം-കോണ്‍ഗ്രസ് നേതാക്കളുമായി അടുത്ത ബന്ധം പുലര്‍ത്തുന്ന വ്യക്തിയാണ് കെപി യോഹന്നാന്‍. മോദിയെ കാണാന്‍ അദ്ദഹത്തിന് അകമ്പടി സേവിച്ച പി.ജെ കുര്യന് കെപി യോഹന്നാനെതിരെ ഉയര്‍ന്നിരിക്കുന്ന പരാതിയെ കുറിച്ചും ആരോപണത്തെ കുറിച്ചും അറിയില്ല എന്ന് പറയുന്നത് വിശ്വസിനീയമല്ല എന്നാണ് വിലയിരുത്തല്‍.