കൊച്ചി: യുവവ്യവസായിയെ തട്ടിക്കൊണ്ടുപോയി തടവില്‍വെച്ച് ഭീഷണിപ്പെടുത്തിയെന്ന ആരോപണത്തില്‍ സിപിഐഎം ജില്ലാ കമ്മിറ്റി അംഗം വി.എം സക്കീര്‍ ഹുസൈനെ കുറ്റവിമുക്തനാക്കി സിപിഐഎം. സക്കീറിനെതിരായ ആരോപണങ്ങളെ കുറിച്ച് അന്വേഷിക്കാന്‍ ചുമതലപ്പെടുത്തിയ എളമരം കരീമിന്റെ ഏകാംഗ കമ്മീഷന്റെ റിപ്പോര്‍ട്ട് പ്രകാരമാണ് നടപടി. സക്കീര്‍ കുറ്റക്കാരനല്ലെന്നും ചെറിയ ജാഗ്രതക്കുറവ് മാത്രമാണ് ഉണ്ടായതെന്നുമാണ് എളമരം കരീമിന്റെ കണ്ടെത്തല്‍. പാര്‍ട്ടി സംസ്ഥാന നേതൃത്വം അംഗീകരിച്ച റിപ്പോര്‍ട്ട് തിങ്കളാഴ്ച ജില്ലാ സെക്രട്ടേറിയറ്റിലും ജില്ലാകമ്മിറ്റിയിലും അവതരിപ്പിച്ചു.
വ്യവസായി ജൂബി പൗലോസിനെ തട്ടിക്കൊണ്ടുപോയി ഭീഷണിപ്പെടുത്തിയെന്ന കേസിലാണ് സക്കീര്‍ ഹുസൈനെ ഒന്നാം പ്രതിയാക്കി പാലാരിവട്ടം പൊലീസ് കേസ് രജിസ്റ്റര്‍ ചെയ്തിരുന്നത്. ഇതുമായി ബന്ധപ്പെട്ട് നവംബര്‍ നാലിന് സക്കീര്‍ ഹുസൈനെ ജില്ലാ സെക്രട്ടേറിയറ്റ് ഏരിയ സെക്രട്ടറി സ്ഥാനത്തുനിന്നും നീക്കം ചെയ്തു. ഈ തീരുമാനം അനുസരിച്ചാണ് സംസ്ഥാന സെക്രട്ടേറിയറ്റ് സംഭവത്തെക്കുറിച്ച് അ്‌ന്വേഷിക്കാന്‍ ഏകാംഗ കമ്മീഷനെ നിയോഗിക്കുന്നത്.
ഏളമരം കരീമിന്റെ കമ്മീഷന്‍ സക്കീറില്‍ നിന്നും വ്യവസായിയില്‍ നിന്നും അഭിപ്രായങ്ങള്‍ കേട്ടശേഷമാണ് റിപ്പോര്‍ട്ട് സമര്‍പ്പിച്ചത്. മറ്റൊരു പാര്‍ട്ടി കമ്മിറ്റിയില്‍ നിന്നുളള നിര്‍ദേശത്തെ തുടര്‍ന്ന് പാര്‍ട്ടി ഏരിയ സെക്രട്ടറിയെന്ന നിലയില്‍ വിഷയത്തില്‍ ഇടപെട്ടെന്നും അതേസമയം ജാഗ്രതക്കുറവ് കാട്ടിയില്ലെന്നുമാണ് കമ്മീഷന്റെ കണ്ടെത്തല്‍. അതുകൊണ്ടുതന്നെ പാര്‍ട്ടിതലത്തില്‍ സക്കീറിനെതിരെ നടപടികള്‍ വേണ്ടെന്നും കമ്മീഷന്‍ നിര്‍ദേശിക്കുന്നു.
തട്ടിക്കൊണ്ടു പോകല്‍ കേസില്‍ 20 ദിവസം ഒളിവില്‍ കഴിഞ്ഞ ശേഷമാണ് സക്കീര്‍ ഹുസൈന്‍ കീഴങ്ങിയത്. ജയില്‍വാസം കഴിഞ്ഞ് ജാമ്യത്തിലിറങ്ങിയതിന് ശേഷം സ്‌പോര്‍ട്‌സ് കൗണ്‍സില്‍ പ്രസിഡന്റ് സ്ഥാനത്തും പാര്‍ട്ടി പ്രവര്‍ത്തനങ്ങളിലും സജീവമായി. പാര്‍ട്ടിക്ക് നാണക്കേടുണ്ടാക്കിയിട്ടും സക്കീര്‍ ഹുസൈനെ ഔദ്യോഗിക സ്ഥാനങ്ങളില്‍ തുടരാന്‍ അനുവദിക്കുന്നതിനെതിരെ സിപിഐഎമ്മിനകത്തുനിന്നു തന്നെ എതിര്‍പ്പ് ഉയര്‍ന്നിരുന്നു. ചില ഉന്നത നേതാക്കളുടെ സംരക്ഷണയിലാണ് സക്കീര്‍ ഹുസൈന്‍ എന്നും ആരോപണമുണ്ട്. കേസിനെത്തുടര്‍ന്ന് ഏരിയക്കമ്മിറ്റി സ്ഥാനത്ത് നിന്ന് നീക്കിയെങ്കിലും ഏരിയക്കമ്മിറ്റി ഭരണം ഇപ്പോഴും സക്കീര്‍ ഹുസൈന്റെ കൈയിലാണെന്നും പാര്‍ട്ടിയിലെ ഒരു വിഭാഗം വാദിക്കുന്നുണ്ട്.
നിലവില്‍ കളമശ്ശേരി പോലീസ് സ്റ്റേഷന്‍ പരിധിയിലെ റൗഡി ലിസ്റ്റില്‍ ഉള്‍പെട്ടയാളാണ് സിപിഐഎം എറണാകുളം ജില്ലാകമ്മിറ്റിയംഗമായ സക്കീര്‍ ഹുസൈന്‍. ഇയാള്‍ റൗഡിയാണെന്നും 15 ക്രിമിനല്‍ കേസില്‍ പ്രതിയാണെന്നും തട്ടിക്കൊണ്ടു പോകല്‍ കേസില്‍ സക്കീര്‍ ഹുസൈന്റെ ജാമ്യാപേക്ഷയെ എതിര്‍ത്ത് സര്‍ക്കാര്‍ കോടതിയില്‍ വ്യക്തമാക്കിയിരുന്നു. വ്യക്തമായ ക്രിമിനല്‍ പശ്ചാത്തലമുണ്ടായിട്ടും ഇയാള്‍ സ്‌പോര്‍ട്‌സ് കൗണ്‍സില്‍ സ്ഥാനത്ത് തുടരുന്നതും കലോത്സവത്തിന്റെ മുഖ്യസംഘാടകനായതിനുമെതിരെയും നേരത്തെ വിമര്‍ശനങ്ങളുയര്‍ന്നിരുന്നു.
Discussion about this post