ലൈഗീക പീഡന പരാതിയില്‍ മുന്‍‌കൂര്‍ ജാമ്യം ലഭിച്ചില്ലെങ്കില്‍ ബിനോയ്‌ കോടിയേരിയെ ഉടന്‍ തന്നെ അറസ്റ്റ് ചെയ്യുമെന്ന് മുംബൈ പോലീസ്. നാളെയാണ് മുന്‍‌കൂര്‍ ജാമ്യാപേക്ഷ പരിഗണിക്കുന്നത്. കേസില്‍ ഡി.എന്‍.എ പരിശോധന അനിവാര്യം ആണെന്നും അന്വേഷണം നേരായ ദിശയിലാണെന്നും ബിനോയിക്കെതിരെ ശക്തമായ തെളിവുകള്‍ ഉണ്ടെന്നും ഡിസിപി മഞ്ജുനാഥ് ഷിന്‍ഡേ പറഞ്ഞു.
ബിനോയ്‌ ഇപ്പോഴും കേരളത്തില്‍ തന്നെയുണ്ടെന്നാണ് പോലീസിന്റെ നിഗമനം. ഉന്നതര രാഷ്ട്രീയ-സാമ്പത്തിക സ്വാധീനമുള്ള വ്യക്തിയായതിനാല്‍ പ്രതിക്ക് രക്ഷപെടാനുള്ള എല്ലാ മാര്‍ഗവും പൂര്‍ണ്ണമായി അടയ്ക്കാനാണ് പോലീസിന്റെ നീക്കം. പ്രതി രാജ്യം വിടാതിരിക്കാനായി ബിനോയ്‌ കോടിയേരിയ്ക്കെതിരെ ലുക്ക് ഔട്ട്‌ നോട്ടീസ് പുറപ്പെടുവിച്ചിട്ടുണ്ട്. പാസ്പ്പോര്‍ട്ട് വിവരങ്ങള്‍ ഉള്‍പ്പടെയുള്ള കാര്യങ്ങള്‍ എമിഗ്രേഷന്‍ വിഭാഗത്തിന് കൈമാറി. 164 വകുപ്പ് പ്രകാരം പരാതിക്കാരിയുടെ രഹസ്യമൊഴിയെടുക്കുന്നതിനുള്ള നടപടികളും പോലീസ് ആരംഭിച്ചിട്ടുണ്ട്.
കേസിന്റെ അടിയന്തരപ്രധാന്യം കണക്കിലെടുത്ത് വനിതാ മജിസ്ട്രേറ്റിനു മുന്‍പാകെ അടുത്തയാഴ്ച തുടക്കത്തില്‍ തന്നെ മൊഴി രേഖപ്പെടുത്തുമെന്നാണ് സൂചന. മുന്‍‌കൂര്‍ ജാമ്യഹര്‍ജ്ജിയില്‍ വാദം പൂര്‍ത്തിയായതിന് ശേഷം തെളിവുകള്‍ പ്രോസിക്യൂഷന്‍ കോടതിയില്‍ സമര്‍പ്പിച്ചേക്കും.
Discussion about this post