ലോകത്തിലെ ഏറ്റവും വലിയ ക്ഷേത്ര സമുച്ചയം. കമ്പോഡിയ എന്ന രാജ്യത്തെ അടയാളപ്പെടുത്തുന്ന അതിന്റെ ദേശീയ പതാകയില്‍ പോലും മുദ്രണം ചെയ്യപ്പെട്ട ക്ഷേത്രം. നഗരം എന്ന് അര്‍ത്ഥം വരുന്ന അങ്കോര്‍ എന്ന പദവും ക്ഷേത്രം എന്നര്‍ത്ഥം വരുന്ന വാട്ട് എന്ന പദവും ചേര്‍ന്നപ്പോള്‍ ആ ക്ഷേത്രസമുച്ചയത്തെ ലോകം ഇങ്ങനെ വിളിച്ചു..അങ്കോര്‍ വാട്ട്. സൂര്യവര്‍മ്മന്‍ രണ്ടാമന്‍ എന്ന ഖെമര്‍ രാജാവാണ് അങ്കോര്‍ വാട്ട് ക്ഷേത്രത്തിന്റെ നിര്‍മ്മാണം ആരംഭിച്ചത്. എന്നാല്‍ അദ്ദേഹത്തിന്റെ ഭരണകാലത്ത് ക്ഷേത്രം പൂര്‍ത്തിയാക്കാന്‍ കഴിഞ്ഞില്ല. പിന്നീട് പ്രദേശം കീഴടക്കിയ ജയവര്‍മ്മന്‍ ഏഴാമന്‍ ആണ് ക്ഷേത്രം പൂര്‍ത്തിയാക്കിയതെന്ന് പറയപ്പെടുന്നു.
പത്തൊന്‍പതാം നൂറ്റാണ്ടിന്റെ ഉത്തരാര്‍ദ്ധത്തില്‍ ഫ്രഞ്ചുകാരാണ് മറഞ്ഞു കിടന്ന ഈ ക്ഷേത്ര നഗരം കണ്ടുപിടിച്ചത്. തുടര്‍ന്ന് ക്ഷേത്രം പുനരുദ്ധരിക്കുന്നതിനുള്ള ശ്രമങ്ങള്‍ ആരംഭിക്കുകയും ചില രാജ്യങ്ങള്‍ പുനരുദ്ധാരണത്തില്‍ സഹായിക്കുകയും ചെയ്യുന്നു. ഇന്ത്യയും തങ്ങളുടേതായ പങ്ക് വഹിക്കുന്നുണ്ട്.
അങ്കോര്‍ വാട്ട് നിലവില്‍ കമ്പോഡിയയിലെ ഏറ്റവും വലിയ വിനോദസഞ്ചാരകേന്ദ്രമാണ്. കമ്പോഡിയയില്‍ വരുന്ന വിദേശ വിനോദസഞ്ചാരികളുടെ 50 ശതമാനവും ക്ഷേത്രം സന്ദര്‍ശിക്കുന്നുണ്ടെന്ന് സര്‍ക്കാരിന്റെ കണക്കുകള്‍ പറയുന്നു.
നാലു ദിവസമുണ്ടെങ്കില്‍ അങ്കോര്‍വാട്ടും അത്യാവശ്യം കമ്പോഡിയയും കണ്ടു മടങ്ങാം. ഏകദേശം നാല്‍പ്പതിനായിരത്തോളം രൂപ ചെലവ് വരും. യുനസ്‌കോ പൈതൃക പട്ടികയില്‍ പെടുത്തിയ ഈ ക്ഷേത്രം കാണുന്നതിന് അതൊരു ചെലവേയല്ല. ലോകത്തിലെ ഏറ്റവും വലിയ ക്ഷേത്ര സമുച്ചയം കാണുന്നത് ഒരു ഭാഗ്യം തന്നെയല്ലേ
