നാല് ഭാര്യമാരിലായി 70 കുട്ടികൾക്ക് ജന്മം നൽകുകയും അതിൽ 58 മക്കൾ നിലവിൽ ജീവിച്ചിരിക്കുകയും ചെയ്യുന്ന അഫ്ഗാനിസ്ഥാൻ സ്വദേശിയായ മുഹമ്മദ് സാദിഖിന്റെ ജീവിതകഥ ശ്രദ്ധ നേടുന്നു. അങ്ങേയറ്റത്തെ ദാരിദ്ര്യത്തിലും പട്ടിണിയിലുമാണ് ഈ കുടുംബം ജീവിക്കുന്നത്. ജനിച്ച കുട്ടികളിൽ പലരുടെയും പേരുകൾ പോലും ഓർത്തെടുക്കാൻ കഴിയുന്നില്ലെന്നും മക്കളെല്ലാവരെയും ‘മകനേ’ അല്ലെങ്കിൽ ‘കുഞ്ഞേ’ എന്നാണ് വിളിക്കാറുള്ളതെന്നും ബി.ബി.സി ഗ്ലോബൽ വിമണിന് നൽകിയ അഭിമുഖത്തിൽ സാദിഖ് വെളിപ്പെടുത്തി.
ഒരു കാർ ഡീലർഷിപ്പിൽ ജോലി ചെയ്യുന്ന സാദിഖിന് വിൽക്കുന്ന ഓരോ കാറിനും ലഭിക്കുന്ന 1,000 അഫ്ഗാനി (ഏകദേശം 15 ഡോളർ) മാത്രമാണ് കുടുംബത്തിന്റെ ഏക വരുമാന മാർഗ്ഗം. അടച്ചുറപ്പുള്ള വാതിലുകളോ ജനലുകളോ ഇല്ലാത്ത മൺ വീടുകളിൽ കഴിയുന്ന ഈ കുടുംബത്തിന് ഭക്ഷണത്തിനും അടിസ്ഥാന സൗകര്യങ്ങൾക്കും വലിയ ബുദ്ധിമുട്ടാണ് നേരിടേണ്ടി വരുന്നത്. അഫ്ഗാനിസ്ഥാനിൽ ഇപ്പോഴും വ്യാപകമായി തുടരുന്ന ബാലവിവാഹമാണ് കുടുംബത്തിന്റെ ദുരവസ്ഥയ്ക്ക് കാരണമെന്ന് സാദിഖ് സമ്മതിക്കുന്നു. പ്രായപൂർത്തിയാകാത്ത പ്രായത്തിൽ വിവാഹം കഴിച്ച ഭാര്യമാർക്ക് കുഞ്ഞുങ്ങളെ പരിപാലിക്കാനുള്ള അനുഭവസമ്പത്തില്ലാത്തതിനാൽ ക്ഷയം, വില്ലൻ ചുമ, തസാര തുടങ്ങിയ രോഗങ്ങൾ ബാധിച്ച് നിരവധി കുഞ്ഞുങ്ങൾ ചെറുപ്പത്തിലേ മരിച്ചുപോയി.
കുഞ്ഞുങ്ങൾക്ക് കൃത്യമായി ഭക്ഷണം നൽകാൻ പോലും സാധിക്കാത്ത ഈ ദുരിതജീവിതം മുൻകൂട്ടി അറിഞ്ഞിരുന്നെങ്കിൽ ഇത്രയധികം കുട്ടികൾക്ക് ജന്മം നൽകില്ലായിരുന്നുവെന്നും അദ്ദേഹം തുറന്നുപറഞ്ഞു. എന്നാൽ സാമ്പത്തിക ബുദ്ധിമുട്ടുകൾക്കിടയിലും കുടുംബം വികസിപ്പിക്കുന്നത് തുടർന്നത് എന്തുകൊണ്ടാണെന്ന് അദ്ദേഹം വ്യക്തമാക്കിയിട്ടില്ല. രാജ്യത്തെ നാലിൽ മൂന്ന് പേരും അടിസ്ഥാന സൗകര്യങ്ങളില്ലാതെ ബുദ്ധിമുട്ടുന്ന അഫ്ഗാനിസ്ഥാനിലെ രൂക്ഷമായ മാനുഷിക പ്രതിസന്ധിയുടെയും ബാലവിവാഹങ്ങളുടെയും നേർചിത്രമാണ് ഈ സംഭവം വ്യക്തമാക്കുന്നത്.
