ലേ: ഇന്ത്യയില് നിന്ന് ചൈന കൈവശപ്പെടുത്തിയ അക്സായ് ചീന് തിരിച്ചു പിടിക്കേണ്ട ,സമയമായെന്നാണ് ഞാന് കരുതുന്നതെന്ന് ലഡാക് എംപി ജംയാങ് ടിസെരിങ് നംഗ്യാല്.
ചൈനയ്ക്ക് ശക്തമായ സന്ദേശം നല്കേണ്ട സമയം എത്തിക്കഴിഞ്ഞെന്നും ടിസെരിങ് നംഗ്യാല് പറഞ്ഞു. 1962ലെ യുദ്ധത്തില് ചൈനീസ് സൈന്യം കൈവശപ്പെടുത്തിയ അക്സായ് ചിന് തിരിച്ചുപിടിക്കണമെന്നും എന്ഡിടിവിക്ക് അനുവദിച്ച അഭിമുഖത്തില് സംസാരിക്കുകയായിരുന്നു എംപി.
1962 മുതല് ഇന്ത്യയെ ചൈന വഞ്ചിക്കുകയാണ്. ഒന്നല്ല, രണ്ടല്ല, നൂറുതവണയായി. 1962ലെ യുദ്ധത്തില് 37,244 ചതുരശ്ര കിലോമീറ്ററാണ് അവര് കൈവശപ്പെടുത്തിയത്. ഇന്ന് അക്സായ് ചിന് എന്നാണ് അറിയപ്പെടുന്നത്. അതുകേള്ക്കുമ്പോള് എനിക്ക് വിചിത്രമായി തോന്നുന്നു. അത് അക്സായ് ചിന് ആയിരിക്കില്ല, മറിച്ച് ചൈന കൈവശപ്പെടുത്തിയ ഇന്ത്യന് പ്രദേശമാണ്. പലരും ചോദിക്കുന്നുണ്ട് അക്സായ് ചിന് തിരിച്ചുപിടിക്കുന്നത് സാധ്യമാണോ എന്ന്. അത് എളുപ്പമാണെന്ന് ഞാന് കരുതുന്നില്ല. എന്നാല് അത് അസാധ്യമല്ല. നമ്മുടെ സൈനികരുടെ രക്തസാക്ഷിത്വത്തിന് ശേഷം അക്സായ് ചിന് തിരിച്ചുപിടിക്കാനുളള സമയമായെന്നാണ് ഞാന് കരുതുന്നതെന്നും അദ്ദേഹം വിശദീകരിച്ചു.
ഞങ്ങള്ക്ക് ഒറ്റത്തവണ പരിഹാരമാണ് വേണ്ടത്. ലഡാക്കിലെ ആളുകള് മാത്രമല്ല രാജ്യത്തുള്ള മുഴുവന് ജനങ്ങളും അതാണ് ആഗ്രഹിക്കുന്നത്. ലഡാക്കിലെ ജനങ്ങള് സൈന്യത്തിനും രാജ്യത്തിനുമൊപ്പമാണ്. സര്ക്കാര് എന്തുതീരുമാനമെടുത്താലും ഞങ്ങള് അതിനൊപ്പം നില്ക്കും. നമ്മുടെ പട്ടാളക്കാരുടെ ജീവന് തുടര്ച്ചയായി നഷ്ടപ്പെടണമെന്ന് ഞങ്ങള് ആഗ്രഹിക്കുന്നില്ല. അതിര്ത്തിയില് താമസിക്കുന്നവരുടെ ജീവിതത്തെ ബാധിക്കുന്ന യാതൊരു പ്രശ്നങ്ങളും ഉണ്ടാകരുതെന്നും ഞങ്ങള് ആഗ്രഹിക്കുന്നു. അതുകൊണ്ടാണ് ഈ തര്ക്കത്തിന് ഒറ്റത്തവണ പരിഹാരം ഞങ്ങള് ആഗ്രഹിക്കുന്നതെന്നും അദ്ദേഹം പറഞ്ഞു.
1962ലെ സര്ക്കാരുപോലെയല്ല ഇപ്പോഴത്തെ സര്ക്കാര്.പ്രധാനമന്ത്ര നരേന്ദ്രമോദി എന്തുപറയുമോ അത് ചെയ്യുമെന്നും നംഗ്യാല് പറഞ്ഞു. 2016ലെ ഉറി ആക്രമണത്തിന് മറുപടിയായി പാകിസ്ഥാനെതിരെ സര്ജിക്കല് സ്ട്രൈക്ക് നടത്തുന്നതിന് മുമ്പ് പ്രധാനമന്ത്രി നരേന്ദ്രമോദിയുടെ പ്രതികരണം ഇപ്പോഴുള്ളതിന് സമാനമായിരുന്നുവെന്നും എംപി ഓര്മിപ്പിച്ചു.ഗല്വാന് താഴ്വരയില് ഉണ്ടായ ഇന്ത്യ-ചൈന സംഘര്ഷത്തില് 20 സൈനികര് വീരമൃത്യു വരിച്ചിരുന്നു. അതിര്ത്തിയില് യുദ്ധസമാന സാഹചര്യം തുടരുകയാണ്. കയ്യേറ്റമുണ്ടായാല് ചൈനയ്ക്ക് വലിയ നഷ്ടമുണ്ടാകുമെന്ന് ഇന്ത്യന് കരസേന മുന്നറിയിപ്പ് നല്കിയിട്ടുണ്ട്.
