ഡല്‍ഹി : വേണ്ടത്ര മുന്നൊരുക്കം ഇല്ലാത്തതിനാലാണ് പാക്കിസ്ഥാനുമായുള്ള ചര്‍ച്ച നടക്കാതെ പോയതെന്ന് മുന്‍ പ്രതിരോധ മന്ത്രിയും കോണ്‍ഗ്രസ് നേതാവുമായ എ.കെ. ആന്റണി. മുന്‍കാല അനുഭവങ്ങള്‍ കണക്കിലെടുക്കാതെയാണ് കേന്ദ്ര സര്‍ക്കാര്‍ ചര്‍ച്ചയ്ക്ക് ഒരുങ്ങിയത്. ഭീകരവാദവും ചര്‍ച്ചയും ഒരുമിച്ച് പോകില്ലെന്നും അദ്ദേഹം പറഞ്ഞു.
അതേസമയം, ഇന്ത്യപാക് ദേശീയ സുരക്ഷാ ഉപദേഷ്ടാക്കളുടെ (എന്‍എസ്എ) ചര്‍ച്ച റദ്ദാക്കിയത് നിര്‍ഭാഗ്യകരമെന്ന് കേന്ദ്ര ആഭ്യന്തര മന്ത്രി രാജ്‌നാഥ് സിങ് വ്യക്തമാക്കി. ഇന്ത്യ ചര്‍ച്ചയ്ക്ക് തയാറായിരുന്നു, എന്നാല്‍ പാക്കിസ്ഥാന്‍ അത് റദ്ദാക്കി. ഇന്ത്യ ഇനിയും പാക്കിസ്ഥാനുമായി സൗഹൃദ ബന്ധത്തിന് ശ്രമിക്കും. തീരുമാനം അവരുടെതാണ് രാജ്‌നാഥ് പറഞ്ഞു.
ഇന്ത്യാ-പാക്ക് ദേശീയ സുരക്ഷാ ഉപദേഷ്ടാക്കള്‍ തമ്മിലുള്ള ചര്‍ച്ചയില്‍ നിന്നു ഇന്നലെ അര്‍ധരാത്രിയാണ് പാക്കിസ്ഥാന്‍ പിന്മാറിയത്. കശ്മീര്‍ വിഘടനവാദികളായ ഹുറിയത് നേതാക്കളുമായി പാക് സുരക്ഷാ ഉപദേഷ്ടാവ് ചര്‍ച്ച നടത്താന്‍ പാടില്ലെന്നും ഇന്ത്യാ-പാക് ചര്‍ച്ചയില്‍ കശ്മീര്‍ വിഷയം ഉന്നയിക്കാനാകില്ലെന്നും വിദേശകാര്യമന്ത്രി സുഷമാ സ്വരാജ് വ്യക്തമാക്കിയ സാഹചര്യത്തിലാണ് പിന്മാറ്റം. ചര്‍ച്ചയ്ക്കായി ഇന്ത്യ ഉപാധികള്‍ വയ്ക്കുന്നത് അംഗീകരിക്കാനാകില്ലെന്നു പറഞ്ഞായിരുന്നു പാക്കിസ്ഥാന്റെ നടപടി.
എന്നാല്‍ പാക്കിസ്ഥാന്റെ തീരുമാനം ദൗര്‍ഭാഗ്യകരമെന്നാണ് ഇന്ത്യന്‍ വിദേശകാര്യ വക്താവ് വികാസ് സ്വരൂപ് പ്രതികരിച്ചത്. ചര്‍ച്ച നടത്തുന്നതിന് ഇന്ത്യ നിബന്ധനകളൊന്നും വച്ചിരുന്നില്ലെന്നും ഷിംല, ഉഫ കരാറുകള്‍ പാക്കിസ്ഥാന്‍ മാനിക്കണമെന്നു മാത്രമാണ് ഇന്ത്യ ആവശ്യപ്പെട്ടതെന്നും വികാസ് സ്വരൂപ് ഇന്നലെ തന്നെ വ്യക്തമാക്കി.
Discussion about this post