ഡൽഹി: പ്രധാനമന്ത്രി നരേന്ദ്ര മോദിയുടെ പുതിയ പദ്ധതിയായ ആത്മനിർഭർ ഭാരതിന് പിന്തുണ പ്രഖ്യാപിച്ച് അമേരിക്കൻ കമ്പനിയായ ആപ്പിൾ ഇന്ത്യയിൽ ഐഫോൺ നിർമ്മിക്കാൻ ഒരുങ്ങുന്നു. ചൈനയിലെ പ്ലാന്റിൽ നിർമ്മിക്കാൻ സജ്ജീകരണങ്ങൾ പൂർത്തിയായ ആപ്പിളിന്റെ മുൻ നിര ഉത്പന്നമായ ഐഫോൺ 11 ആണ് ചൈന വിട്ട് ചെന്നൈയിലേക്ക് എത്തുന്നത്. ചെന്നൈയിലെ ഫോക്സ്കോൺ പ്ലാന്റിലാണ് ആപ്പിളിന്റെ ഐഫോണ് 11 നിര്മിക്കുന്നത്.
ആപ്പിള് ഇന്ത്യയില് ഐഫോണ് 11 നിർമ്മിക്കാൻ തയ്യാറാകുന്നത് രാജ്യത്തിന് മികച്ച മാതൃകയാണെന്ന് കേന്ദ്ര വാണിജ്യമന്ത്രി പിയൂഷ് ഗോയൽ വ്യക്തമാക്കി. ഇതിന് പുറമെ ഐ ഫോണ് എസ്ഇ 2020 ബെംഗളുരുവിനടുത്തുള്ള വിസ്ട്രോണ് പ്ലാന്റില് നിർമ്മിക്കാനും ആപ്പിളിന് പദ്ധതിയുണ്ട്. ആപ്പിളിന്റെ പ്രധാന വിതരണക്കാരായ ഫോക്സ്കോണ് ഈ മാസം ആദ്യം ഐ ഫോണ് നിര്മിക്കുന്നതിനുള്ള പ്ലാന്റ് വിപുലീകരണത്തിനായി 100 കോടി ഡോളര്വരെ നിക്ഷേപിക്കാന് പദ്ധതിയിട്ടിരുന്നു. ഫോക്സ്കോണിന് പുറമെ രണ്ടാമത്തെ വലിയ ഐഫോണ് നിര്മാതാക്കളായ പെഗാട്രോണും ഭാവിയില് ഇന്ത്യയില് നിക്ഷേപം നടത്തിയേക്കുമെന്നും സൂചനയുണ്ട്.
നേരത്തെ ഐഫോണ് എക്സ്ആര് ബെംഗളുരുവിലെ പ്ലാന്റിൽ ഘടകഭാഗങ്ങൾ സംയോജിപ്പിച്ച് വിപണിയിൽ ഇറക്കിയിരുന്നു. പ്രധാനമന്ത്രി നരേന്ദ്ര മോദിയുടെ ‘മേക്ക് ഇൻ ഇന്ത്യ‘ പദ്ധതിക്കുള്ള ഐക്യദാർഢ്യമായാണ് ഇതെന്ന് ഫോക്സ്കോൺ അന്ന് വ്യക്തമാക്കിയിരുന്നു.
Discussion about this post