ഡൽഹി: വിജയദശമി ആശംസകൾ നേർന്ന് പ്രധാനമന്ത്രി നരേന്ദ്ര മോദി. പ്രതിസന്ധികൾക്ക് മേൽ ക്ഷമ കൈവരിച്ച വിജയമാണ് വിജയദശമിയുടെ സന്ദേശമെന്ന് അദ്ദേഹം പറഞ്ഞു. ഈ വർഷത്തെ ദസ്സറ ആഘോഷങ്ങൾ നിയന്ത്രണങ്ങൾക്ക് വിധേയമായി കൊണ്ടാടണമെന്നും സാധനങ്ങൾ വാങ്ങുമ്പോൾ തദ്ദേശീയ ഉത്പന്നങ്ങൾക്ക് പ്രാമുഖ്യം നൽകണമെന്നും അദ്ദേഹം പറഞ്ഞു. പ്രതിമാസ റേഡിയോ പരിപാടിയായ മൻ കി ബാത്തിൽ ജനങ്ങളെ അഭിസംബോധന ചെയ്യുകയായിരുന്നു അദ്ദേഹം.
ഇത് വിജയദശമി ആഘോഷത്തിന്റെ വേളയാണ്. ഈ വിശിഷ്ടാവസരത്തിൽ ഞാൻ ഏവർക്കും ആശംസകൾ നേരുകയാണ്. അസത്യത്തിന് മേൽ സത്യം വിജയം വരിച്ചതിന്റെ ആഘോഷമാണ് ദസ്സറ. പ്രതിസന്ധിക്ക് മേൽ ക്ഷമ കൈവരിച്ച വിജയത്തിന്റെ ആഘോഷം കൂടിയാണ് ഇത്. ഇന്ന് നാമേവരും നിയന്ത്രണങ്ങൾ പാലിച്ച് ആഘോഷങ്ങൾ ലളിതമായി കൊണ്ടാടുന്നു. ഈ യുദ്ധത്തിൽ നമ്മൾ പൊരുതുകയാണ്. വിജയം സുനിശ്ചിതമാണെന്നും അദ്ദേഹം വ്യക്തമാക്കി.
ഇത്തവണ എല്ലാ ആഘോഷ കൂട്ടയ്മകളും നമ്മൾ ചുരുക്കിയിരിക്കുകയാണെന്നും ഈദ് അടക്കമുള്ള എല്ലാ ആഘോഷങ്ങളിലും ഇത് പാലിക്കപ്പെടണമെന്നും അദ്ദേഹം ഓർമ്മിപ്പിച്ചു. ഇത്തവണ തദ്ദേശീയ ഉത്പന്നങ്ങൾക്ക് പ്രാമുഖ്യം നൽകി ‘വോക്കൽ ഫോർ ലോക്കൽ‘ എന്ന മുദ്രാവക്യം സാർത്ഥകമാക്കണമെന്നും പ്രധാനമന്ത്രി ആഹ്വാനം ചെയ്തു.
സമൂഹത്തിൽ നമുക്ക് വേണ്ടി അദ്ധ്വാനിക്കുന്നത് ആരൊക്കെയാണ് എന്ന് ലോക്ക്ഡൗൺ നാളുകളിൽ നാം തിരിച്ചറിഞ്ഞതാണ്. ശുചീകരണ തൊഴിലാളികൾ, വീട്ടുജോലിക്കാർ, സുരക്ഷാഭടന്മാർ തുടങ്ങിയവർ ദുരിതകാലങ്ങളിൽ നമുക്കൊപ്പം നിന്നു. ഈ ആഘോഷ വേളയിൽ നാം അവരേയും ഒപ്പം കൂട്ടണം. നമ്മുടെ അതിരുകൾ കാക്കുന്ന ധീരസൈനികരെയും നമ്മൾ ഓർക്കണമെന്നും പ്രധാനമന്ത്രി പറഞ്ഞു. ഭാരതമാതാവിന്റെ ഈ ധീരസന്താനങ്ങൾക്ക് വേണ്ടി നമ്മുടെ ഭവനങ്ങളിൽ ദീപം കൊളുത്തണമെന്നും മൻ കി ബാത്തിൽ പ്രധാനമന്ത്രി അഭ്യർത്ഥിച്ചു.
Discussion about this post