ഡൽഹി: ഒരു രാജ്യം, ഒരു തെരഞ്ഞെടുപ്പ്’ നടത്താൻ തയ്യാറാണെന്ന് പ്രഖ്യാപിച്ച് മുഖ്യ തെരഞ്ഞെടുപ്പ് കമ്മീഷണർ സുനിൽ അറോറ. നേരത്തെ ‘ഒരു രാജ്യം, ഒരു തെരഞ്ഞെടുപ്പ്’ എന്ന ആശയം പ്രധാനമന്ത്രി നരേന്ദ്രമോദി ആഹ്വാനം ചെയ്തിരുന്നതാണ്. ഇതിനു പിന്നാലെയാണ് ഇത്തരമൊരു നീക്കത്തിന് കേന്ദ്ര തിരഞ്ഞെടുപ്പ് കമ്മീഷൻ ഒരുക്കമാണെന്ന് സൂചിപ്പിച്ച് തിരഞ്ഞെടുപ്പ് കമ്മീഷണർ രംഗത്ത് വന്നിട്ടുള്ളത്.
ഇതിന് വേണ്ട നിയമഭേദഗതികൾ വരുത്തിയാൽ ഒരു രാജ്യം, ഒരു തെരഞ്ഞെടുപ്പ് നടപ്പിലാക്കാൻ തെരഞ്ഞെടുപ്പ് കമ്മീഷൻ ഒരുക്കമാണെന്ന് സുനിൽ അറോറ പറയുന്നു. ഈ ആശയം പ്രധാനമന്ത്രി നരേന്ദ്രമോദി മുന്നോട്ട് വെച്ചത് നവംബർ മാസത്തിലാണ്. അന്ന്, വിവിധ കാലങ്ങളിൽ നടക്കുന്ന വിവിധ തിരഞ്ഞെടുപ്പുകൾ രാജ്യത്തെ വികസന പ്രവർത്തനങ്ങളെ ബാധിക്കുന്നുവെന്ന് പ്രധാനമന്ത്രി ചൂണ്ടിക്കാട്ടിയിരുന്നു.
പുതിയ സംവിധാനം നടപ്പാക്കുന്നതിൽ ഏറ്റവും ഉത്തരവാദിത്തപ്പെട്ട ഏജൻസി തിരഞ്ഞെടുപ്പ് കമ്മീഷനാണെന്നതിനാൽ തെരഞ്ഞെടുപ്പ് കമ്മീഷന്റെ പ്രസ്താവന നിർണായകമാണ്. ഇതിനു മുമ്പ് 2015-ൽ ഇ.എം സുദർശൻ നാച്ചിയപ്പൻ നേതൃത്വം നൽകിയ പാർലമെന്റ് കമ്മിറ്റിയും 2018-ലെ ലോ കമ്മീഷൻ റിപ്പോർട്ടും ഈ ആശയം മുന്നോട്ടു വെച്ചിരുന്നു.
Discussion about this post