കോഴിക്കോട്: പന്തീരങ്കാവ് സ്വദേശി ലെഫ്റ്റന്‍റ് ജനറല്‍ പ്രദീപ് നായര്‍ അസം റൈഫിള്‍സ് ഡയറക്ടര്‍ ജനറലായി ചുമതലയേറ്റു. അസം റൈഫിള്‍സിന്‍റെ 21ാമത്തെ ഡയറക്ടര്‍ ജനറലായി ഷില്ലോങ്ങിലെ ആസ്ഥാനത്താണ് സ്ഥാനമേറ്റത്. അസം, വടക്ക് കിഴക്കന്‍ സംസ്ഥാനങ്ങള്‍ എന്നിവിടങ്ങളില്‍ പ്രവര്‍ത്തനപരിചയമുള്ള അദ്ദേഹം നേരത്തെ അസം റൈഫിള്‍സില്‍ ഇന്‍സ്‌പെക്ടര്‍ ജനറലായിരുന്നു. അതുകൂടാതെ അസം റൈഫിള്‍സ് ബ്രിഗേഡ് കമാന്‍ഡറുമായിരുന്നു.
അസം റൈഫിള്‍സ് തലപ്പത്തെത്തുന്ന രണ്ടാമത്തെ മലയാളിയാണ് പ്രദീപ് നായര്‍. അതിവിശിഷ്ട സേവ മെഡലും യുദ്ധസേവ മെഡലും നേടിയിട്ടുണ്ട്. സത്താറ സൈനിക സ്കൂള്‍, നാഷണല്‍ ഡിഫന്‍സ് അക്കാദമി, ഡിഫന്‍സ് സര്‍വീസസ് സ്റ്റാഫ് കോളജ്, ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് പബ്ലിക് അഡ്മിനിസ്ട്രേഷന്‍ എന്നിവിടങ്ങളിലെ പൂര്‍വ വിദ്യാര്‍ഥിയാണ്.
1985ല്‍ സിഖ് റെജിമെന്റിലാണ് ഓഫിസറായി പ്രദീപ് കരസേനയില്‍ ചേര്‍ന്നത്. സിയാച്ചിനിലടക്കം സേവനമനുഷ്ഠിച്ച ഇദ്ദേഹം അസം റൈഫിള്‍സ് ഐ.ജിയായും കമ്പനി കമാന്‍ഡറായും സേവനമനുഷ്ഠിച്ചു. പന്തീരങ്കാവ് സ്വദേശി ചന്ദ്രന്‍ നായരുടെയും പരപ്പനങ്ങാടി നെടുവ ചൊനാംകണ്ടത്തില്‍ പരേതയായ ലീലയുടെയും മകനാണ്. പുഷ്പയാണ് ഭാര്യ. മക്കള്‍: പ്രശോഭ്, പൂജ.
Discussion about this post