തിരുവനന്തപുരം: സി.പി.എം നേതൃത്വത്തിന് സംഭവിച്ച പിഴവുകള്‍ വീണ്ടും തുറന്നു പറഞ്ഞ് പ്രതിപക്ഷ നേതാവ് വി.എസ് അച്യുതാനന്ദന്‍. ജനശക്തി മാസികയുടെ പുതിയ ലക്കത്തിലെ അഭിമുഖത്തിലാണ് പാര്‍ട്ടിയുടെ പോരായ്മകളും പിഴവുകളും വി.എസ് ചൂണ്ടിക്കാട്ടുന്നത്.
2009ലെ ലോക്‌സഭാ തെരഞ്ഞെടുപ്പില്‍ പി.ഡി.പിയുമായി ഉണ്ടാക്കിയ സഖ്യം സി.പി.എമ്മിന് ദോഷം ചെയ്‌തെന്നും 18 സീറ്റ് ലഭിക്കേണ്ടിടത്ത് നാല് സീറ്റില്‍ പാര്‍ട്ടി ഒതുങ്ങിയെന്നും വി.എസ് പറഞ്ഞു. വര്‍ഗീയ പാര്‍ട്ടികളുമായി കൂട്ടുകൂടിയത് പാര്‍ട്ടിക്ക് സംഭവിച്ച പോരായ്മയാണ്. ജനതാദള്‍, ആര്‍.എസ്.പി കക്ഷികള്‍ എല്‍.ഡി.എഫ് വിട്ടുപോയത് മുന്നണിക്ക് ക്ഷീണം ചെയ്തു. അവരെ മുന്നണിയിലേക്ക് തിരികെ കൊണ്ടുവരാന്‍ നടപടികള്‍ സ്വീകരിക്കണം-വി.എസ് പറയുന്നു.
2006, 2011 നിയമസഭാ തെരഞ്ഞെടുപ്പുകളില്‍ വ്യക്തിവിരോധത്തിന്റെ പേരില്‍ ചിലയാളുകള്‍ തനിക്ക് സീറ്റ് നിഷേധിച്ചെങ്കിലും കേന്ദ്ര നേതൃത്വം ഇടപെട്ട് സീറ്റ് നല്‍കുകയായിരുന്നുവെന്നും അദ്ദേഹം അഭിമുഖത്തില്‍ പറയുന്നു.
Discussion about this post