ന്യൂഡൽഹി : ന്യൂയോർക്കിൽ നിന്ന് ഡൽഹിയിലേക്ക് വരികയായിരുന്ന എയർ ഇന്ത്യ വിമാനത്തിൽ മദ്യപിച്ച് അശ്ലീലപ്രദർശനം അടക്കം നടത്തി യാത്രക്കാരൻ . 2022 നവംബർ 26 ന് ബിസിനസ് ക്ലാസിൽ യാത്ര ചെയ്തിരുന്നയാൾക്കെതിരെയാണ് പരാതി . മദ്യപിച്ച് 70 വയസ്സുള്ള സഹയാത്രികയുടെ മേൽ മൂത്രമൊഴിക്കുകയും , അശ്ലീലപ്രദർശനം നടത്തുകയും ചെയ്തുവെന്നാണ് പരാതി.
2022 നവംബർ 26ന് യുഎസിലെ ജോൺ എഫ് കെന്നഡി എയർപോർട്ടിൽ നിന്ന് ഡൽഹിയിലേക്ക് വരികയായിരുന്ന എഐ-102 വിമാനത്തിലാണ് സംഭവം. വിമാനത്തിനുള്ളിലെ ലൈറ്റുകൾ ഡിം ചെയ്തതിന് ശേഷമാണ് സംഭവമെന്ന് യാത്രക്കാരി പറയുന്നു.
“ഭക്ഷണം വിളമ്പുകയും ലൈറ്റുകൾ ഡിം ചെയ്യുകയും ചെയ്ത ഉടൻ മറ്റൊരു യാത്രക്കാരൻ എന്റെ സീറ്റിൽ വന്ന് മൂത്രമൊഴിക്കാൻ തുടങ്ങി. അശ്ലീലപ്രർശനവും നടത്തി . ഞാൻ ഇക്കാര്യം ക്യാബിൻ ക്രൂവിനെ അറിയിച്ചു, പക്ഷേ ആ യാത്രക്കാരൻ ഡൽഹിയിലെത്തിയ ശേഷം ഭയമില്ലാതെ തന്റെ പ്രവർത്തി തുടർന്നു . തന്റെ വസ്ത്രങ്ങളും ബാഗും ചെരുപ്പും മൂത്രത്തിൽ നനഞ്ഞിരുന്നുവെന്നും യാത്രക്കാരി പറഞ്ഞു.
സംഭവത്തിന് ശേഷം ക്രൂ അംഗം തനിക്ക് ഒരു ജോഡി പൈജാമയും ചെരിപ്പും നൽകിയെന്നും തുടർന്ന് അതേ സീറ്റിലേക്ക് മടങ്ങാൻ ആവശ്യപ്പെട്ടതായും സ്ത്രീ ആരോപിച്ചു ബിസിനസ് ക്ലാസിൽ നിരവധി സീറ്റുകൾ ഒഴിഞ്ഞുകിടക്കുമ്പോഴാണ് ഇങ്ങനെ ചെയ്തതെന്നും എന്നാൽ തന്നോട് സീറ്റിൽ ഇരിക്കാൻ ആവശ്യപ്പെട്ടെന്നും അവർ പറയുന്നു. ആ സമയത്ത്, സംഭവത്തെക്കുറിച്ച് വിമാനത്തിലുണ്ടായിരുന്ന ക്രൂ അംഗത്തോട് പരാതിപ്പെട്ടിരുന്നുവെങ്കിലും അവർ ഭക്ഷണം വിതരണം ചെയ്തുകൊണ്ട് വിഷയം ഒതുക്കുക മാത്രമാണ് ചെയ്തത്.
എയർ ഇന്ത്യ ചെയർമാൻ എൻ ചന്ദ്രശേഖരന് യുവതി ഇത് സംബന്ധിച്ച് കത്തെഴുതിയതോടെയാണ് സംഭവം പുറത്തറിയുന്നത്. ‘ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (ഡിജിസിഎ)’ സംഭവത്തെക്കുറിച്ച് ‘എയർ ഇന്ത്യ’യോട് റിപ്പോർട്ട് തേടിയിട്ടുണ്ട്.സംഭവത്തിൽ എയർ ഇന്ത്യയും പോലീസിൽ പരാതി നൽകിയിട്ടുണ്ട്.
