മൂണിയില്ലാതെ ഗുജറാത്ത്; യുപിക്കെതിരെ ഭേദപ്പെട്ട സ്കോർ

മുംബൈ: വനിതാ പ്രീമിയർ ലീഗ് ക്രിക്കറ്റിൽ ആദ്യ മത്സരത്തിനിറങ്ങിയ യുപി വാറിയേഴ്സിനെതിരെ ഗുജറാത്ത് ജയന്റ്സിന് ഭേദപ്പെട്ട സ്കോർ. ടോസ് നേടി ബാറ്റിംഗ് തിരഞ്ഞെടുത്ത ഗുജറാത്ത് 20 ഓവറിൽ 6 വിക്കറ്റ് നഷ്ടത്തിൽ 169 റൺസെടുത്തു. ആദ്യ മത്സരത്തിൽ പേശീവലിവ് മൂലം കളം വിട്ട ക്യാപ്ടൻ ബെഥ് മൂണി ഇന്നും കളിക്കാൻ ഇറങ്ങിയില്ല. പകരം സ്നേഹ് റാണയാണ് ഇന്ന് ഗുജറാത്തിനെ നയിക്കുന്നത്.

32 പന്തിൽ 46 റൺസെടുത്ത ഹർലീൻ ഡിയോൾ ആണ് ഗുജറാത്തിന്റെ ടോപ് സ്കോറർ. ആഷ്ലി ഗാർഡ്നർ 25 റൺസും ഓപ്പണർ മേഘന 24 റൺസും നേടി. ദയാളൻ ഹേമലത 13 പന്തിൽ 21 റൺസുമായി പുറത്താകാതെ നിന്നു.

യുപി വാറിയേഴ്സിന് വേണ്ടി സോഫി എക്ലെസ്റ്റൺ, ദീപ്തി ശർമ്മ എന്നിവർ 2 വിക്കറ്റുകൾ വീതം നേടി. ഉദ്ഘാടന മത്സരത്തിൽ കഴിഞ്ഞ ദിവസം മുംബൈയോട് ദയനീയമായി പരാജയപ്പെട്ട ശേഷം, ഭേദപ്പെട്ട പ്രകടനമാണ് ഇന്ന് ഗുജറാത്ത് ബാറ്റർമാർ കാഴ്ചവെച്ചിരിക്കുന്നത്.