തിരുവനന്തപുരം: കോൺഗ്രസ് നേതാവ് ബിന്ദു കൃഷ്ണയുടെ ഭർത്താവും ഡിസിസി ജനറൽ സെക്രട്ടറിയുമായ കൃഷ്ണകുമാറിനെതിരെ പരാതി. കെപിസിസി ഓഫീസിൽ വച്ച് കൃഷ്ണകുമാർ അപമര്യാദയായി പെരുമാറിയെന്നാണ് മഹിളാ കോൺഗ്രസ് സംസ്ഥാന നേതാവ് സുനിത വിജയന്റെ ആരോപണം. കൃഷ്ണകുമാറിനെതിരെ സുനിത മ്യൂസിയം പോലീസിൽ പരാതി നൽകിയിട്ടുണ്ട്.
മഹിളാ കോൺഗ്രസ് പുന:സംഘടനയുമായി ബന്ധപ്പെട്ട തർക്കത്തിന്റെ പേരിൽ കൃഷ്ണകുമാർ അപമര്യാദയായി പെരുമാറിയെന്നാണ് സുനിതയുടെ പരാതി. വിഷയത്തിൽ കെപിസിസിയുടേയും മഹിളാ കോൺഗ്രസിന്റേയും ഭാഗത്ത് നിന്ന് നീതി കിട്ടിയില്ലെന്നും സുനിത ആരോപിച്ചു.
മഹിളാ കോൺഗ്രസ് തിരുവനന്തപുരം ജില്ലാ അദ്ധ്യക്ഷ സ്ഥാനത്തേക്ക് സുനിതയുടെ പേരും പരിഗണിച്ചിരുന്നു. എന്നാൽ രമേശ് ചെന്നിത്തല വിഭാഗത്തിൽ പെട്ട തന്നെ പരിഗണിക്കില്ലെന്ന് കൃഷ്ണകുമാർ വെല്ലുവിളിച്ചിരുന്നുവെന്നാണ് സുനിത പറയുന്നത്. പുന:സംഘടനയിൽ സംസ്ഥാന ജനറൽ സെക്രട്ടറിയായി സുനിതയെ നിയമിച്ചെങ്കിലും പ്രതിഷേധിച്ച് രാജി വയ്ക്കുകയായിരുന്നു.
