ഓക് ലാൻഡ്: പ്രധാനമന്ത്രി നരേന്ദ്രമോദിയുടെ പ്രതിമാസ റേഡിയോ സംവാദ പരിപാടി മൻ കി ബാത്തിന്റെ 100 ാം എപ്പിസോഡ് പ്രവാസി ഇന്ത്യൻ സമൂഹവും അവിസ്മരണീയമാക്കി. ന്യൂസിലാൻഡിലെ ഓക് ലാൻഡിൽ പ്രവാസി സമൂഹം സംഘടിപ്പിച്ച ചടങ്ങിൽ പ്രധാനമന്ത്രിയെ കേൾക്കാനെത്തിയ 100 വയസുകാരി മുത്തശ്ശി രാംബെൻ ആയിരുന്നു താരം. മൻ കി ബാത്തിന്റെ നൂറാം എപ്പിസോഡിൽ 100 വയസ് കഴിഞ്ഞ മുത്തശ്ശിയുടെ സാന്നിദ്ധ്യം പരിപാടിക്കെത്തിയ പ്രവാസി സമൂഹത്തിന് മുഴുവൻ ആവേശമായി.
ഓക് ലാൻഡിലെ പ്രവാസി ഇന്ത്യൻ സമൂഹവും കിവി കമ്യൂണിറ്റിയുമാണ് പ്രധാനമന്ത്രി നരേന്ദ്രമോദിയുടെ മൻ കി ബാത് 100 ാം എപ്പിസോഡ് ലൈവായി പ്രക്ഷേപണം ചെയ്തത്. പ്രവാസികൾ ഉൾപ്പെടെ നിരവധി പേർ പ്രധാനമന്ത്രിയുടെ സംവാദ പരിപാടി കേൾക്കാൻ എത്തി. സദസ്സിന്റെ മുൻനിരയിൽ തന്നെയാണ് രാംബെന്നിന് ഇരിപ്പിടം ഒരുക്കിയിരുന്നത്.
മൻ കി ബാത്തിന് ശേഷം പ്രവാസ സമൂഹത്തെ അഭിസംബോധന ചെയ്ത രാംബെൻ അമൃതകാലത്തിൽ ഇന്ത്യയുടെ സമൃദ്ധിക്കായി ആശംസകളും അനുഗ്രഹങ്ങളും നേർന്നു. നാരീശക്തി വിളിച്ചോതി 100 വനിതകളെ പരിപാടിയിൽ പങ്കെടുപ്പിച്ചതും ശ്രദ്ധേയമായി. ന്യൂസിലൻഡിലെ ഇന്ത്യൻ ഹൈക്കമ്മീഷൻ പരിപാടിയുടെ ചിത്രങ്ങൾ ട്വിറ്റർ അക്കൗണ്ടിൽ പോസ്റ്റ് ചെയ്തിട്ടുണ്ട്.
വേദിയിൽ ഉണ്ടായിരുന്ന പ്രധാനമന്ത്രിയുടെ ചിത്രത്തിന് മുൻപിൽ കൈകൂപ്പിയും തലയിൽ തൊട്ട് അനുഗ്രഹിക്കാൻ മുത്തശ്ശി ശ്രമിക്കുന്നതിന്റെയും ചിത്രങ്ങളും ട്വിറ്ററിൽ വൈറലായിക്കഴിഞ്ഞു.
Discussion about this post