മലപ്പുറം: കരിപ്പൂർ വിമാനത്താവളം വഴി സ്വർണം കടത്താൻ ശ്രമിച്ച ദമ്പതികൾ പിടിയിൽ. കൊടുവള്ളി എളേറ്റിൽ സ്വദേശി ഷറഫുദ്ദീൻ, ഭാര്യ ഷമീന എന്നിവരാണ് അറസ്റ്റിലായത്. ഇവരുടെ പക്കൽ നിന്നും രണ്ട് കിലോ സ്വർണം പിടിച്ചെടുത്തു.
മലദ്വാരത്തിലും അടിവസ്ത്രത്തിലും ഒളിപ്പിച്ചായിരുന്നു ഇവർ സ്വർണം കടത്താൻ ശ്രമിച്ചത്. ദുബായിൽ നിന്നുമാണ് ദമ്പതികൾ വിമാനത്താവളത്തിൽ എത്തിയത്. എന്നാൽ സുരക്ഷാ പരിശോധനയ്ക്കിടെ ഇവർക്ക് പിടിവീഴുകയായിരുന്നു. സംശയം തോന്നിയതിനെ തുടർന്ന് വിശദമായി നടത്തിയ പരിശോധനയിലാണ് ഇവരെ പിടികൂടിയത്. ഇവരുടെ പക്കൽ നിന്നും പിടിച്ചെടുത്ത സ്വർണത്തിന് 1.15 കോടി വിലവരുമെന്ന് അധികൃതർ അറിയിച്ചു.
ദമ്പതികൾക്കൊപ്പം ഇവരുടെ കുട്ടികളും ഉണ്ടായിരുന്നു. ദുബായിലേക്ക് അവധിക്കാല സന്ദർശനത്തിനായി പോയതായിരുന്നു ഇവർ. കുടുംബവുമായി എത്തുന്ന യാത്രികർക്ക് വിമാനത്താവളത്തിൽ പരിഗണന നൽകാറുണ്ട്. ഇത് മുതലെടുത്ത് സ്വർണം കടത്താൻ ആയിരുന്നു ഇവരുടെ ശ്രമം.
നേരത്തെ കരിപ്പൂർ വിമാനത്താവളത്തിൽ വസ്ത്രത്തിൽ സ്വർണം ഒളിപ്പിച്ച് കടത്താൻ ശ്രമിച്ച യുവതിയെ പിടികൂടിയിരുന്നു. കുന്നമംഗലം സ്വദേശിനി ഷബ്‌നയാണ് പോലീസിന്റെ പിടിയിലായത്. യുവതിയുടെ പക്കൽ നിന്നും 1.17 കോടി രൂപയുടെ സ്വർണം പിടിച്ചെടുത്തു. പോലീസിനെ കബളിപ്പിച്ച് കടക്കാൻ ശ്രമിച്ച ഷബ്‌നയെ തന്ത്രപരമായാണ് പോലീസ് പിടികൂടിയത്.
Discussion about this post