പറവൂർ : ആംബുലൻസ് വാടകയുമായി ബന്ധപ്പെട്ട തർക്കം മൂലം രോഗിയെ ആശുപത്രിയിലെത്തിക്കാൻ വൈകിയതോടെ രോഗി മരിച്ചു. നീണ്ടൂർ കൈതക്കൽ വീട്ടിൽ അസ്മ (72) ആണ് മരിച്ചത്. താലൂക്ക് ഗവൺമെന്റ് ആശുപത്രിയിലെ ആംബുലൻസ് ഡ്രൈവറുടെ അനാസ്ഥയാണ് ഇതിന് കാരണമെന്ന് കുടുംബം ആരോപിച്ചു. പരാതിയെത്തുടർന്ന് ആംബുലൻസ് ഡ്രൈവറെ സസ്പെൻഡ് ചെയ്തു.
കടുത്ത പനിമൂലം ഇന്ന് രാവിലെയാണ് അസ്മയെ താലൂക്ക് ആശുപത്രിയിൽ എത്തിച്ചത്. രോഗം മൂർച്ഛിത്തതോടെ എറണാകുളം ജനറൽ ആശുപത്രിയിലേക്ക് കൊണ്ടുപോകാൻ ഡോക്ടർമാർ നിർദേശിച്ചു. തുടർന്ന് രോഗിയെ ആശുപത്രി ആംബുലൻസിൽ കയറ്റി. എന്നാൽ ആംബുലൻസ് വാടകയായ 900 രൂപ തന്നാൽ മാത്രമേ ആശുപത്രിയിലേക്ക് കൊണ്ടുപോകൂ എന്ന് ഡ്രൈവർ പറയുകയായിരുന്നു.
രോഗിയുടെ കൂടെയുള്ളവരുടെ കൈയ്യിൽ പണം ഇല്ലാത്തതിനാൽ ആശുപത്രിയിൽ എത്തിച്ച ശേഷം നൽകാം എന്ന് പറഞ്ഞെങ്കിലും ഡ്രൈവർ വഴങ്ങിയില്ല. തുടർന്ന് ഇവർ നീണ്ടൂരുള്ള വീട്ടിലെത്തി പണമെടുത്ത് ഡ്രൈവർക്ക് നൽകിയതിന് ശേഷം മാത്രമാണ് രോഗിയെ ആംബുലൻസിൽ കൊണ്ടുപോകാൻ ഡ്രൈവർ തയ്യാറായത്.
എന്നാൽ ആശുപത്രിയിൽ എത്തി മിനിറ്റുകൾക്കകം അസ്മ മരിച്ചു. തുടർന്നാണ് ഡ്രൈവർക്കതിരെ നടപടിയെടുക്കണമെന്ന ആവശ്യവുമായി കുടുംബം രംഗത്തെത്തിയത്.
Discussion about this post