റാഞ്ചി : കിഴക്കൻ ഇന്ത്യയിലെ തന്നെ ഏറ്റവും വലിയ ഓപ്പൺ എയർ ചിത്രശലഭ പാർക്ക് ജാർഖണ്ഡിൽ തുറക്കാൻ ഒരുങ്ങുന്നു. റാഞ്ചിയിലെ ഭഗവാൻ ബിർസ ബയോളജിക്കൽ പാർക്കിൽ ആണ് ഈ ചിത്രശലഭ പാർക്ക് ഒരുങ്ങുന്നത്. 19 ഏക്കർ വിസ്തൃതിയിലുള്ള ഒരു വിശാലമായ ചിത്രശലഭ പാർക്ക് ആയിരിക്കും ഇത്. പാർക്ക് പൊതുജനങ്ങൾക്കായി ഉടൻ തുറക്കുമെന്ന് ഭഗവാൻ ബിർസ ബയോളജിക്കൽ ഡയറക്ടർ ജബ്ബാർ സിംഗ് അറിയിച്ചു.
വളരെ പച്ചപ്പ് നിറഞ്ഞ ഒരു പ്രദേശത്താണ് ചിത്രശലഭ പാർക്ക് ഒരുക്കിയിരിക്കുന്നത്. ഇത് പരിസ്ഥിതി ശാസ്ത്രത്തിൽ ചിത്രശലഭങ്ങളുടെ പ്രാധാന്യത്തെക്കുറിച്ച് സന്ദർശകരെ ബോധവാന്മാരാക്കാൻ സഹായിക്കുമെന്ന് ജബ്ബാർ സിംഗ് പറഞ്ഞു. ചിത്രശലഭ പ്രേമികൾക്ക് വിനോദത്തോടൊപ്പം വിദ്യാഭ്യാസ മൂല്യങ്ങളും പകർന്നുനൽകുക എന്ന ലക്ഷ്യത്തോടെയുള്ള ആദ്യഘട്ട വികസന പ്രവർത്തനങ്ങൾ ഏകദേശം രണ്ട് കോടി രൂപ ചെലവിൽ പൂർത്തിയായതായും അദ്ദേഹം വ്യക്തമാക്കി. ചിത്രശലഭങ്ങളുടെ സാന്നിധ്യം മികച്ച പരിസ്ഥിതിയുടെ സൂചകമാണ് എന്നും 75 ലധികം ഇനം ചിത്രശലഭങ്ങൾ ജാർഖണ്ഡിൽ കാണപ്പെടുന്നുണ്ടെന്നും അവയ്ക്ക് സ്വാഭാവികമായി വളരുന്നതിന് അനുയോജ്യമായ അന്തരീക്ഷം പാർക്കിൽ ഒരുക്കുമെന്നും അദ്ദേഹം കൂട്ടിച്ചേർത്തു.
ഒരു ബട്ടർഫ്ലൈ കൺസർവേറ്ററി, അമൃത് ചെടികൾ , ബട്ടർഫ്ലൈ പാർക്കിനുള്ള നടപ്പാത, ഒരു കുളം, പ്രവേശന കവാടം തുടങ്ങിയവ ഉൾപ്പെടുന്ന ലാൻഡ്സ്കേപ്പ് ആണ് ആദ്യഘട്ടത്തിൽ തയ്യാറാക്കിയിരിക്കുന്നത്. പക്ഷികളിൽ നിന്നും മറ്റ് ഉപദ്രവകാരികളിൽ നിന്നും ചിത്രശലഭങ്ങളെ സംരക്ഷിക്കുന്നതിനായി 900 ചതുരശ്ര മീറ്റർ വിസ്തീർണ്ണത്തിൽ ഒരു കവർ കൺസർവേറ്ററി ആണ് ഇവിടെ നിർമ്മിച്ചിട്ടുള്ളത്. ജാർഖണ്ഡിൽ കാണപ്പെടുന്ന ട്വനി കോസ്റ്റർ, സാർജന്റ്, ബുഷ് ബ്രൗൺ, ബാരനെറ്റ്, പ്ലെയിൻ ടൈഗർ, ലെമൺ പാൻസി, കോമൺ സെയിലർ തുടങ്ങിയ ഭൂരിഭാഗം ഇനങ്ങളെയും പാർക്കിൽ സംരക്ഷിക്കാൻ മൃഗശാല അതോറിറ്റി ശ്രമിക്കുമെന്നും അധികൃതർ അറിയിച്ചു.
Discussion about this post