ന്യൂഡൽഹി: ആരോഗ്യ പദ്ധതികൾ ജനങ്ങളിലേക്ക് പ്രായോഗികമായി എത്തിക്കുന്നതിനായി ആയുഷ്മാൻ ഭവ പദ്ധതിയുമായി കേന്ദ്രസർക്കാർ. കേന്ദ്ര സർക്കാർ നടപ്പിലാക്കി വരുന്ന മുഴുവൻ ആരോഗ്യ പദ്ധതികളും രാജ്യത്തെ അവസാനത്തെ പൗരനിലേക്ക് വരെ എത്തിക്കുകയാണ് പദ്ധതി ലക്ഷ്യം വെയ്ക്കുന്നത്. കേന്ദ്ര ആരോഗ്യ മന്ത്രാലയമാണ് പദ്ധതി സംബന്ധിച്ച് ഔദ്യോഗിക പ്രഖ്യാപനം നടത്തിയത്
ആയുഷ്മാൻ ആപ്കെ ദ്വാറിന്റെ ഒന്നും രണ്ടും ഘട്ടത്തിലെ ക്യാമ്പയിൻ വൻ വിജയമായിരുന്നു. അതേസമയം ആഗസ്റ്റ് ഒന്ന് മുതൽ ആപ്കെ ദ്വാർ 3.0 ന്റെ ക്യാമ്പയിൻ ആളുകളിലേക്ക് വ്യാപിപ്പിക്കുമെന്നും അധികൃതർ അറിയിച്ചു.
ആയുഷ്മാൻ സഭ ക്യാമ്പയിൻ ഗ്രാമീണ തലത്തിലായിരിക്കും നടത്തുക. ഗ്രാമത്തിലെ ആളുകൾക്ക് പദ്ധതിയെ കുറിച്ച് കൂടുതൽ അവബോധം നൽകുന്നതിനായി ഗ്രാമത്തിലെ ആരോഗ്യ, ശുചീകരണ, പോഷകാഹാര കമ്മിറ്റിയെയും ഉൾപ്പെടുത്തിക്കൊണ്ടാണ് ക്യാമ്പയിൻ നടത്തുന്നത്. അതേസമയം പ്രധാൻ മന്ത്രി ജൻ ആരോഗ്യ യോജന എന്ന ആരോഗ്യ ഇൻഷുറൻസിന്റെ പ്രാധാന്യത്തെക്കുറിച്ചും സർക്കാർ നടപ്പിലാക്കി വരുന്ന മറ്റ് പദ്ധതികളെ കുറിച്ചും ഗ്രാമപ്രദേശങ്ങളിലെ ആളുകൾക്ക് ബോധവൽക്കരണം നൽകും.
പകർച്ചവ്യാധികളെ കുറിച്ചും, ജനിതക രോഗങ്ങൾ, ജീവിതശൈലി രോഗങ്ങൾ എന്നിവ സംബന്ധിച്ചും ഗ്രാമഗ്രാമാന്തരങ്ങളിൽ ബോധവത്ക്കരണ പരിപാടി സംഘടിപ്പിക്കും. കുട്ടികൾക്കുണ്ടാകുന്ന അസുഖങ്ങൾ, രോഗപ്രതിരോധശേഷി, പോഷകാഹാരം, അനീമിയ എന്നിവയെക്കുറിച്ചും ബോധവൽക്കരണം നൽകും. സിക്കിൾ സെൽ അനീമിയ അഥവാ അരിവാൾ രോഗം , പാർക്കിൻസൺസ് രോഗം, പ്രമേഹം, വൃക്ക സംബന്ധമായ അസുഖങ്ങൾ എന്നിവയാണ് സമ്പർക്ക പരിപാടിയിൽ ഉൾപ്പെടുത്തുന്നത്. പിഎംജെഎവൈ കാർഡ് വിതരണവും പദ്ധതിയിൽ ഉൾപ്പെട്ടിരിക്കുന്ന ആശുപത്രിയെ കുറിച്ചുള്ള വിവരങ്ങളും ജനങ്ങൾക്ക് വിശദീകരണം നൽകും.
ആയുഷ്മാൻ ഭവയുടെ മൂന്നാം ഘട്ടമായ ആയുഷ്മാൻ മേള മെഡിക്കൽ കോളേജുകളിൽ മെഡിക്കൽ ക്യാമ്പ് വഴിയാണ് നടത്തുന്നത്. സർക്കാർ സ്വകാര്യ മേഖലകളിലായി ആകെ 705 മെഡിക്കൽ കോളേജുകളാണ് ഉള്ളത്. ഇതിൽ ഓരോ മെഡിക്കൽ കോളേജുകളിലായി 50 മെഡിക്കൽ ക്യാമ്പുകളാണ് സംഘടിപ്പിക്കുന്നത്. ഇതിലൂടെ 300 മുതൽ 400 വരെ ഒപിഡി ചികിത്സാരീതികൾ നടപ്പാക്കുകയാണ് ലക്ഷ്യം. 1.25 മുതൽ 1.5 കോടിയിലധികം രോഗികളെ ആരോഗ്യ കേന്ദ്രങ്ങളിൽ ചികിത്സിപ്പിക്കുന്നുണ്ടെന്നും അധികൃതർ കൂട്ടിച്ചേർത്തു. ഇതുവഴി ആളുകളുടെ രോഗപ്രതിരോധ ശേഷി, മാനസികാരോഗ്യം എന്നിവയും പരിശോധിക്കാൻ കഴിയും.
നാലാം ഘട്ടമായ ആയുഷ്മാൻ ഗ്രാം വഴി പിഎംജെഎവൈ കാർഡ് വിതരണം, എബിഎച്ച്എ ഐഡി ജനറേഷൻ, പ്രതിരോധ ശേഷിയുടെ കവറേജ് എന്നിവയെല്ലാം വിഭാവനം ചെയ്യുന്നുണ്ട്. ഇത്തരം ക്യാമ്പുകൾ നടത്തുന്നതു വഴി രാജ്യത്തിലുള്ള എല്ലാ പൗരന്മാരെയും പദ്ധതിയുടെ ഭാഗമാക്കുകയാണ് ലക്ഷ്യം.
