എറണാകുളം: അന്തരിച്ച സംവിധായകൻ സിദ്ദിഖിന്റെ കുടുംബത്തെ കണ്ട് തമിഴ് നടൻ സര്യ. കാക്കനാട്ടെ വീട്ടിലെത്തിയാണ് സൂര്യ കുടുംബാംഗങ്ങളെ കണ്ടത്. നിർമ്മാതാവ് രാജശേഖറും അദ്ദേഹത്തിനൊപ്പം ഉണ്ടായിരുന്നു.
ഇന്നലെ വൈകീട്ടോടെയായിരുന്നു സൂര്യ സിദ്ദിഖിന്റെ വീട്ടിൽ എത്തിയത്. കുടുംബാംഗങ്ങളെ സൂര്യ ആശ്വസിപ്പിച്ചു. ഏകദേശം ഒരു മണിക്കൂറോളം അവിടെ ചിലവഴിച്ച ശേഷം ആയിരുന്നു സൂര്യ മടങ്ങിയത്. സൂര്യ സിദ്ദിഖിന്റെ വീട് സന്ദർശിക്കുന്നതിന്റെ വീഡിയോ സമൂഹമാദ്ധ്യമങ്ങളിൽ വ്യാപകമായി പ്രചരിക്കുന്നുണ്ട്.
സിദ്ദിഖിന്റെ വിയോഗ വാർത്തയ്ക്ക് പിന്നാലെ സൂര്യ ട്വിറ്ററിലൂടെ ദു:ഖം രേഖപ്പെടുത്തിയിരുന്നു. ഇതിന് പിന്നാലെ ആയിരുന്നു വീട്ടിൽ എത്തി കുടുംബാംഗങ്ങളെ കണ്ടത്. അഭിനേതാക്കളുടെ ചെറിയ സംഭാവനയെപ്പോലും മടികൂടാതെ അഭിനന്ദിക്കാൻ ശ്രമിക്കുന്ന സംവിധായകൻ ആണ് സിദ്ദിഖ് എന്നും, അദ്ദേഹത്തോട് തീർത്താൽ തീരാത്ത കടപ്പാട് ഉണ്ടെന്നുമായിരുന്നു സൂര്യ പറഞ്ഞത്.
ജയറാം, മുകേഷ്, ശ്രീനിവാസൻ എന്നിവരെ കഥാപാത്രമാക്കി നിർമ്മിച്ച സുപ്പർ ഹിറ്റ് സിനിമ ഫ്രണ്ട്സ് സിദ്ദിഖ് തമിഴിൽ റീ മേക്ക് ചെയ്തപ്പോൾ നായകന്മാരിൽ ഒരാൾ സൂര്യയായിരുന്നു. ഈ സിനിമയിൽ നിന്നുമായിരുന്നു ഇരുവരുടെയും അടുപ്പം ആരംഭിച്ചത്. സൂര്യയ്ക്ക് ഈ ചിത്രം ഏറെ നിർണായകമായിരുന്നു.
Discussion about this post