ന്യൂഡൽഹി : ഗാന്ധി ജയന്തിയോട് അനുബന്ധിച്ച് ‘സ്വച്ഛതാ ഹി സേവ’ ക്യാമ്പെയ്നിന്റെ ഭാഗമായി ശുചീകരണ പ്രവർത്തനങ്ങളിൽ ഏർപ്പെട്ട് പ്രധാനമന്ത്രി നരേന്ദ്ര മോദി. ഗുസ്തി താരം അങ്കിത് ബയാൻപുരിയ്ക്കൊപ്പം ചേർന്നാണ് പ്രധാനമന്ത്രി ശുചീകരണ പ്രവർത്തനങ്ങൾ നടത്തിയത്. ഇതിന്റെ വീഡിയോ അദ്ദേഹം സോഷ്യൽ മീഡിയയിൽ പങ്കുവെച്ചിട്ടുണ്ട്.
വീഡിയോയിൽ, മോദി ഗുസ്തി താരത്തോട് അദ്ദേഹത്തിന്റെ ദിനചര്യയെക്കുറിച്ചും ശരീരം നന്നായി നോക്കുന്നതിനെക്കുറിച്ചും സംസാരിച്ചു. ”വ്യായാമത്തിനായി നിങ്ങൾ എത്ര സമയം നീക്കിവെയ്ക്കും?” പ്രധാനമന്ത്രി ചോദിച്ചു.
”അധികമില്ല സർ, ഏകദേശം 4-5 മണിക്കൂർ. എന്നാൽ നിങ്ങളെ കാണുമ്പോൾ എനിക്ക് കൂടുതൽ പ്രചോദനവും ഉന്മേഷവും ലഭിക്കുന്നു” അങ്കിത് പറഞ്ഞു.
‘ഞാൻ അധികം വ്യായാമം ചെയ്യാറില്ല, പക്ഷേ ഞാൻ അച്ചടക്കത്തോടെ എല്ലാം ചെയ്യും. എനിക്ക് നിലവിൽ അച്ചടക്കമില്ലാത്ത രണ്ട് കാര്യങ്ങളുണ്ട് – ഒന്ന് എന്റെ ഭക്ഷണത്തിന്റെ സമയമാണ്, മറ്റൊന്ന് എനിക്ക് ഉറക്കത്തിനായി കുറച്ച് സമയം നീക്കിവയ്ക്കേണ്ടതുണ്ട്, അത് എനിക്ക് ചെയ്യാൻ കഴിയാറില്ല, ”പ്രധാനമന്ത്രി പറഞ്ഞു.
സോഷ്യൽ മീഡിയയെ പോസിറ്റീവായി ഉപയോഗിക്കുന്നതിന് പ്രധാനമന്ത്രി അങ്കിത്തിനെ പ്രശംസിച്ചു. ”സോഷ്യൽ മീഡിയ എങ്ങനെ പോസിറ്റീവായി ഉപയോഗിക്കാമെന്നതിന്റെ ഉത്തമ ഉദാഹരണമാണ് നിങ്ങൾ നൽകുന്നത്. ജിമ്മിൽ പോയിരുന്ന യുവാക്കൾ ഇപ്പോൾ നിങ്ങളുടെ ദിനചര്യകൾ പിന്തുടരുന്നത് ഞാൻ കാണുന്നു,” പ്രധാനമന്ത്രി കൂട്ടിച്ചേർത്തു.
”ഇന്ന്, രാജ്യം സ്വച്ഛതയിൽ ശ്രദ്ധ കേന്ദ്രീകരിക്കുകയാണ്. ഞാനും അങ്കിത് ബയാൻപുരിയയും ചേർന്ന് കുറച്ച് ശുചീകരണ പ്രവർത്തനങ്ങളിൽ ഏർപ്പെട്ടു. കേവലം ശുചിത്വത്തിനപ്പുറം, ഫിറ്റ്നസിനേക്കുറിച്ചും ജനങ്ങളുടെ ക്ഷേമത്തെക്കുറിച്ചും ഞങ്ങൾ സംസാരിച്ചു. എല്ലാ സ്വച്ഛ്, സ്വസ്ഥ ഭാരത്തിനെക്കുറിച്ചായിരുന്നു” മോദി വീഡിയോയിൽ കുറിച്ചു.
Discussion about this post