കസാക്കിസ്ഥാനിൽ ഉരുക്ക് വ്യവസായ ഭീമൻ ആർസെലർ മിത്തലിന്റെ ഉടമസ്ഥതയിലുള്ള കൽക്കരി ഖനിയിൽ തീപിടുത്തം. തീപിടിത്തത്തിൽ 21 പേർ മരിച്ചതായി സ്ഥിരീകരിച്ചു. മീഥൈൻ വാതകം ചോർന്നതാണ് അപകടത്തിന് കാരണമായി പറയപ്പെടുന്നത്. കസാക്കിസ്ഥാനിലെ കോസ്റ്റെങ്കോ ഖനിയിലാണ് തീപിടുത്തം ഉണ്ടായത്.
അപകടം നടക്കുന്ന സമയം ഖനിയിൽ ജോലി ചെയ്തിരുന്ന 252 പേരിൽ 23 പേരെ ഇപ്പോഴും കാണാനില്ലെന്ന് കമ്പനി അറിയിച്ചു. 18 പേർ ചികിത്സയിൽ കഴിയുന്നുണ്ട്. ആർസെലർ മിത്തലിന്റെ ഉടമസ്ഥതയിലുള്ള കൽക്കരി ഖനികളിൽ കഴിഞ്ഞ മൂന്ന് മാസത്തിനിടെ ഇത് രണ്ടാമത്തെ അപകടമാണ് ഉണ്ടാവുന്നത്. ഓഗസ്റ്റിൽ കരഗണ്ട ഖനിയിൽ ഉണ്ടായ തീപിടിത്തത്തിൽ നാല് തൊഴിലാളികൾ കൊല്ലപ്പെട്ടിരുന്നു.
കമ്പനി ദേശസാൽക്കരിക്കാൻ പദ്ധതിയുള്ളതിനാൽ നിക്ഷേപം നിർത്തിവയ്ക്കാൻ കസാഖ് പ്രസിഡന്റ് കാസിം-ജോമാർട്ട് ടോകയേവ് ഉത്തരവിട്ട അതേ ദിവസമാണ് ഖനിയിൽ തീപിടുത്തമുണ്ടായത്. അപകടമുണ്ടായതോടെ കമ്പനിയുമായുള്ള നിക്ഷേപ സഹകരണം നിർത്താൻ സർക്കാർ തീരുമാനമെടുത്തിട്ടുണ്ട്. ഇരകളായവരുടെ കുടുംബങ്ങളെ കസാക്കിസ്ഥാൻ പ്രസിഡണ്ട് അനുശോചനം അറിയിച്ചു.
Discussion about this post