തിരുവനന്തപുരം : മന്ത്രി കെ രാധാകൃഷ്ണന്റെ പ്രൈവറ്റ് സെക്രട്ടറി സ്ഥാനത്തു നിന്ന് മുൻ എംപി എ സമ്പത്തിനെ മാറ്റി. മന്ത്രിയും പ്രൈവറ്റ് സെക്രട്ടറിയും തമ്മിലുള്ള സ്വരചേർച്ചയില്ലായ്മയാണ് മാറ്റത്തിന് കാരണം എന്നാണ് സൂചന. കെ രാധാകൃഷ്ണന്റെ ആവശ്യ പ്രകാരമാണ് സമ്പത്തിനെ സെക്രട്ടറി സ്ഥാനത്തു നിന്നും മാറ്റിയിട്ടുള്ളത്. സമ്പത്തിന്റെ പ്രവർത്തനങ്ങളിലെ അതൃപ്തിയാണ് മന്ത്രിയുടെ ഈ തീരുമാനത്തിന് പിന്നിലെന്ന് പറയുന്നു.
2021 ജൂലൈയിലാണ് എ സമ്പത്തിനെ മന്ത്രി കെ രാധാകൃഷ്ണന്റെ പ്രൈവറ്റ് സെക്രട്ടറിയായി നിയമിച്ചത്. മൂന്ന് തവണ ആറ്റിങ്ങൽ എംപിയായിരുന്ന എ സമ്പത്ത് 2019 ലെ തിരഞ്ഞെടുപ്പിൽ അടൂർ പ്രകാശിനോട് തോറ്റിരുന്നു. തുടർന്ന് ഡൽഹിയിൽ കേരളത്തിന്റെ പ്രത്യേക പ്രതിനിധിയായി സമ്പത്തിനെ നിയമിച്ചിരുന്നു. എന്നാൽ ഡൽഹിയിൽ 7.26 കോടി രൂപ സർക്കാർ പണം ചെലവാക്കിയതിന്റെ പേരിൽ വിവാദങ്ങൾ ഉണ്ടായതോടെയാണ് അദ്ദേഹത്തിന് സ്ഥാനമാറ്റം നൽകിയിരുന്നത്.
കേരള ഗസറ്റഡ് ഓഫീസേർസ് അസോസിയേഷൻ നേതാവായിരുന്ന ശിവകുമാർ ആണ് മന്ത്രി കെ രാധാകൃഷ്ണന്റെ പുതിയ പ്രൈവറ്റ് സെക്രട്ടറി. കഴിഞ്ഞ എൽഡിഎഫ് സർക്കാരിൽ മുൻ മന്ത്രി ടികെ രാമകൃഷ്ണന്റെ അഡീഷണൽ പ്രൈവറ്റ് സെക്രട്ടറിയായിരുന്നു കെ ശിവകുമാർ.
Discussion about this post