ഫിറോസാബാദ് :ഉത്തര്പ്രദേശില് കുടിലിന് തീപിടിച്ച് 3 കുട്ടികള് മരിച്ചു. ഫിറോസാബാദ് ഖാദിത് ഗ്രാമത്തിലാണ് ദാരുണ സംഭവം. കുട്ടികള് കുടിലില് ഉറങ്ങി കിടക്കുമ്പോഴാണ് തീ പിടിക്കുന്നത്. പിതാവ് ഷക്കില് കുട്ടികളെ രക്ഷിക്കാന് ശ്രമിച്ചെങ്കിലും ഫലമുണ്ടായില്ല. സാമ്ന (7), അനീസ് (4), രണ്ട് വയസുകാരി രേഷ്മ എന്നിവരാണ് മരിച്ചത്.
ഷക്കിലും ഭാര്യ മംജാദിയും മൂന്ന് കുട്ടികളും കുടിലില് ഉറങ്ങുന്നതിനിടെയാണ് ശനിയാഴ്ച രാത്രി തീപിടിത്തമുണ്ടാകുന്നത്. രണ്ട് കുട്ടികള് സംഭവസ്ഥലത്ത് വെച്ച് തന്നെ മരിച്ചു. മൂന്നാമത്തെ കുട്ടിയെ പൊള്ളലോടെ ആശുപത്രിയില് എത്തിച്ചെങ്കിലും ഇന്ന് പുലര്ച്ചെയോടെ മരണത്തിന് കീഴടങ്ങി. ഗുരുതരമായി പൊള്ളലേറ്റ ഷക്കീല് ആഗ്രയിലെ ആശുപത്രിയില് ചികിത്സയിലാണ്. ഭാര്യ മംജാദി പരിക്കേല്ക്കാതെ രക്ഷപ്പെട്ടതായി പോലീസ് വ്യക്തമാക്കി.
തീപിടിത്തത്തിന്റെ കാരണം വ്യക്തമല്ല. സംഭവത്തില് അന്വേഷണം പ്രഖ്യാപിച്ചിട്ടുണ്ട്. കുടുംബത്തിന് ദുരിതാശ്വാസ നിധിയില് നിന്ന് സഹായം നല്കുമെന്ന് ജില്ലാ മജിസ്ട്രേറ്റ് ഉജ്ജ്വല് കുമാര് അറിയിച്ചു.
