തൃശൂർ : കാൽ കഴുകാൻ ആയി കുളത്തിൽ ഇറങ്ങിയ വിദ്യാർത്ഥിനികൾ വഴുതി വെള്ളത്തിൽ വീണ് മുങ്ങി മരിച്ചു. പിതാവിനോടൊപ്പം കാൽ കഴുകാനായി കുളത്തിൽ ഇറങ്ങിയ സഹോദരിമാരാണ് മരണപ്പെട്ടത്. തൃശ്ശൂർ കുന്നംകുളം പന്തല്ലൂരിലാണ് സംഭവം.
പഴുന്നാന സ്വദേശി അഷ്കറിന്റെ മക്കളായ 13 വയസ്സുകാരി ഹസ്നത്ത്, 9 വയസ്സുകാരി മഷിദ എന്നിവരാണ് കുളത്തിൽ മുങ്ങി മരണപ്പെട്ടത്. ഒരു വിവാഹ ചടങ്ങിൽ പങ്കെടുക്കാൻ എത്തിയതായിരുന്നു ഈ പിതാവും കുട്ടികളും. വയലിനോട് ചേർന്നുള്ള കുളത്തിൽ കുട്ടികൾ കാൽ കഴുകാനായി ഇറങ്ങിയപ്പോഴാണ് അപകടമുണ്ടായത്.
ഞായറാഴ്ച തന്നെ മലപ്പുറം തവനൂരിലും സമാനമായ രീതിയിൽ രണ്ടു കുട്ടികൾ മുങ്ങി മരിച്ചു. പുഴയിൽ കുളിക്കാൻ ഇറങ്ങിയ കുട്ടികളാണ് ഒഴുക്കിൽപ്പെട്ട് മുങ്ങി മരിച്ചത്. കോഴിക്കോട് സ്വദേശികളായ അശ്വിൻ, ആയുർ രാജ് എന്നിവരാണ് മരണപ്പെട്ടത്.
Discussion about this post