ന്യൂഡൽഹി: തലസ്ഥാനത്ത് നടക്കുന്ന ട്യൂലിപ്പ് ഫെസ്റ്റിവലിൽ പങ്കെടുത്ത് നൈതർലൻഡ്‌സ് അംബാസിഡർ മരിസ ജെറാർഡ്‌സ്. ഈ ട്യൂലിപ്‌സ് പൂക്കൾ ഇരു രാജ്യങ്ങളും തമ്മിലുള്ള ഉത്തമ ബന്ധത്തിന്റെ സാക്ഷിയാണെന്ന് മരിസ ജെറാർഡ്‌സ് പറഞ്ഞു. ഡൽഹിയിലെ ശാന്തി പാതയുടെ റൗണ്ട് എബൗട്ട് ക്രോസിലാണ് ട്യൂലിപ്‌സ് ഫെസ്റ്റിവൽ നടക്കുന്നത്. ന്യൂഡൽഹി മുനിസിപ്പൽ കോർപ്പറേഷൻ (എൻഡിഎംസി) ചെയർമാൻ അമിത് യാദവിനോടൊപ്പമാണ് നെതർലൻഡ്‌സിന്റെ പ്രതിനിധി ഫെസ്റ്റിവൽ സന്ദർശിച്ചത്.
‘ഞങ്ങൾ ഒരുമിച്ച് നട്ടുപിടിപ്പിച്ച ട്യൂലിപിസ് പൂക്കളെ കണ്ട് വരാനിരിക്കുന്ന വസന്തം ആഘോഷിക്കാനായി എൻഡിഎംസി ചെയർമാൻ അമിത് യാദവിനൊപ്പം ഞാൻ എത്തിയിരിക്കുകയാണ്. ഇന്ത്യയും നെതർലൻഡ്സും തമ്മിലുള്ള ഉത്തമമായ ബന്ധത്തിന്റെ സാക്ഷിയാണ് ഈ ട്യൂലിപ്‌സ് പൂക്കൾ’- മരിസ ജെറാർഡ്‌സ് പറഞ്ഞു.
ട്യൂലിപ്‌സ് ഫെസ്റ്റിവലിൽ എത്തി ആളുകൾ നിറങ്ങൾ ആസ്വദിക്കുന്നതിന്റെയും പുതിയ ഋതുവിനെ വരവേൽക്കുന്നതിന്റെയും സന്തോഷവും അവർ പങ്കുവച്ചു. ഇരു രാജ്യങ്ങളിലെയും ജനങ്ങളെ തമ്മിൽ ബന്ധിപ്പിക്കുന്നതിനുള്ള മികച്ച മാർഗമാണിത്. ട്യൂലിപ്‌സ് പൂക്കളെ അവതരിപ്പിച്ചുകൊണ്ട് നിരവധി ബോളിവുഡ് സിനിമകൾ കണ്ടിട്ടുണ്ടെന്നും അവർ കൂട്ടിച്ചേർത്തു. കഴിഞ്ഞ ദിവസം സെക്രട്ടറി ഗിരിധർ അരമനയുമായി ഡൽഹിയിൽ മരിസ ജെറാർഡ്‌സ് ചർച്ച നടത്തിയിരുന്നു.
Discussion about this post