തൃശ്ശൂർ : പ്രസിദ്ധമായ ഗുരുവായൂർ ഉത്സവത്തിന് കൊടിയേറി. 10 ദിവസം നീളുന്ന ഗുരുവായൂർ ഉത്സവകാലത്ത് ക്ഷേത്രത്തിൽ വിശേഷാൽ പൂജകളും ചടങ്ങുകളും നടക്കുന്നതാണ്. മാർച്ച് ഒന്നിന് ആറാട്ടിനു ശേഷം കൊടിയിറങ്ങുന്നതോടെയാണ് ഈ വർഷത്തെ ഉത്സവത്തിന് പരിസമാപ്തി ആകുക.
ഗുരുവായൂർ ഉത്സവത്തിന്റെ ഭാഗമായി ഇന്ന് നടന്ന ആനയോട്ട മത്സരത്തിൽ ഗുരുവായൂർ ഗോപീ കണ്ണൻ ഒന്നാമതെത്തി. ഇത് ഒമ്പതാം തവണയാണ് ഗോപീ കണ്ണൻ ആനയോട്ടമത്സരത്തിൽ വിജയിയാകുന്നത്. പതിവിന് വിപരീതമായി സുരക്ഷാ മാനദണ്ഡങ്ങൾ കണക്കിലെടുത്ത് ഇത്തവണ 10 ആനകൾ മാത്രമായിരുന്നു ആനയോട്ടത്തിൽ പങ്കെടുത്തിരുന്നത്.
ആനയോട്ടത്തിൽ ഒന്നാമതെത്തിയ ഗുരുവായൂർ ഗോപീ കണ്ണൻ ആയിരിക്കും ഇനിയുള്ള ഉത്സവ ദിവസങ്ങളിൽ ഭഗവാന്റെ തിടമ്പ് ശിരസ്സിൽ ഏറ്റുന്നത്. ഉത്സവ ദിവസങ്ങളിൽ പ്രത്യേക പരിചരണത്തോടെ ക്ഷേത്രനാലകത്തിനകത്ത് തന്നെയായിരിക്കും ഗോപീ കണ്ണൻ കഴിയുക. 2001ൽ തൃശ്ശൂരിലെ നന്തിലത്ത് ഗ്രൂപ്പ് ഉടമയായ എം ജി ഗോപാലകൃഷ്ണൻ ഗുരുവായൂരിൽ നടയിരുത്തിയ ആനയാണ് ഗോപീ കണ്ണൻ.
ഫെബ്രുവരി 29ന് ആണ് ഈ വർഷത്തെ ഉത്സവത്തിന്റെ ഭാഗമായുള്ള ചരിത്രപ്രസിദ്ധമായ ഗുരുവായൂർ പള്ളിവേട്ട നടക്കുന്നത്. നാളെ മുതൽ ഉത്സവത്തിന്റെ അവസാന ദിവസമായ ആറാട്ട് ദിനം വരെ ഗുരുവായൂരപ്പന്റെ തങ്കത്തിടമ്പ് പകൽ നാലമ്പലത്തിനകത്ത് തെക്ക് ഭാഗത്തും രാത്രി ചുറ്റമ്പലത്തിലെ വടക്കേ നടയിലും സ്വർണപഴുക്കാ മണ്ഡപത്തിൽ എഴുന്നള്ളിച്ച് വയ്ക്കുന്നതാണ്.
Discussion about this post