ന്യൂഡൽഹി: മൂനാം വട്ട തിരഞ്ഞെടുപ്പ് വിജയത്തിന് ശേഷം നടപ്പിലാക്കേണ്ട പദ്ധതികളെ കുറിച്ചുള്ള രൂപ രേഖ തയ്യാറാക്കാൻ ബി ജെ പി നേതാക്കളോടും കേന്ദ്ര മന്ത്രിമാരോടും ആവശ്യപ്പെട്ട് പ്രധാനമന്ത്രി നരേന്ദ്ര മോദി. കഴിഞ്ഞ ദിവസം നടന്ന ക്യാബിനറ്റ് മീറ്റിങ്ങിൽ വച്ചാണ് “നമ്മൾ വീണ്ടും അധികാരത്തിൽ എത്തി കഴിയുമ്പോൾ അടുത്ത 100 ദിവസത്തേക്കുള്ള നിങ്ങളുടെ പദ്ധതി എന്താണ്?” എന്ന് അദ്ദേഹം കേന്ദ്ര മന്ത്രിമാരോട് ആരാഞ്ഞത്.
എന്നാൽ ഇതിൽ മാത്രം ഒതുങ്ങുന്നില്ല കാര്യങ്ങൾ . 2024 മുതൽ 2029 വരെയുള്ള അടുത്ത അഞ്ച് വർഷത്തേക്കുള്ള പ്രവർത്തന മേഖലകൾ തിരിച്ചറിയാനും യോഗത്തിൽ മന്ത്രിമാരോട് ആവശ്യപ്പെട്ടതായി ദേശീയ മാധ്യമങ്ങൾ റിപ്പോർട്ട് ചെയ്തിട്ടുണ്ട്.ഇത് കൂടാതെ പ്രധാനമന്ത്രിയുടെ നിർദ്ദേശ പ്രകാരം കാബിനറ്റ് സെക്രട്ടേറിയറ്റിലെ ഉദ്യോഗസ്ഥർ ഓരോ മന്ത്രിയുമായും വ്യക്തിപരമായി ബന്ധം സ്ഥാപിക്കുകയും വരും വർഷങ്ങളിലെ പദ്ധതികളെക്കുറിച്ച് കണ്ടെത്തുകയും ചെയ്യുമെന്നാണ് പ്രതീക്ഷിക്കപ്പെടുന്നത്.
മാർച്ച് 3 ന് രാജ്യതലസ്ഥാനത്തെ സുഷമ സ്വരാജ് ഭവനിൽ ഒരു ദിവസം നീണ്ടുനിൽക്കുന്ന ചർച്ചകൾക്കായി മന്ത്രിമാരുടെ കൗൺസിൽ യോഗം ചേരും. തെരഞ്ഞെടുപ്പിന് മുമ്പ് നിലവിലെ സർക്കാരിൻ്റെ അവസാന മന്ത്രിതല യോഗമായിരിക്കും അത് . 2024ൽ ബിജെപി അധികാരത്തിൽ വന്നാൽ അടുത്ത 100 ദിവസത്തേക്കുള്ള കാര്യപരിപാടികൾ ഏതൊക്കെയാണ് എന്നതിലേക്ക് ശ്രദ്ധ കേന്ദ്രീകരിച്ച് കൗൺസിലുമായി വിശദമായ ചർച്ച നടന്നേക്കുമെന്ന് ബന്ധപ്പെട്ട വൃത്തങ്ങൾ സൂചിപ്പിച്ചു.
Discussion about this post