വിനീത് ശ്രീനിവാസന്റെ വർഷങ്ങൾക്ക് ശേഷം തിയേറ്ററുകളിൽ എത്തിയിട്ട് ദിവസങ്ങൾ പിന്നിട്ടതേയുള്ളു. സിനിമ മികച്ച അഭിപ്രായത്തോടെ പ്രദർശനം തുടരുകയാണ്. എന്നാൽ മകന്റെ സിനിമ കാണുന്ന ചിത്രം ഇപ്പോൾ പങ്കുവച്ചിരിക്കുകയാണ് മോഹൻലാൽ. വീട്ടിലെ തിയേറ്ററിൽ ഇരുന്ന് സിനിമ കാണുന്ന ചിത്രമാണ് നടൻ പോസ്റ്റ് ചെയ്തിരിക്കുന്നത്. ഈ പോസ്റ്റ് ഇരു കൈയും നീട്ടിയാണ് സോഷ്യൽ മീഡിയ സ്വീകരിച്ചിരിക്കുന്നത്.
ചിത്രത്തിനൊപ്പം ഒരു കുറിപ്പും നടൻ കുറിച്ചിട്ടുണ്ട്. വർഷങ്ങൾക്കു ശേഷം സിനിമ കണ്ടതിന് ശേഷം താൻ തന്റെ പഴയകാലങ്ങളിലേക്ക് പോയി. കഠിനമായ ഭൂതകാലത്തെ അതേ തീവ്രതയോടെ പുനരാവിഷ്കരിക്കുകയല്ല വിനീത് ചെയ്തിരിക്കുന്നത്. അനുഭവങ്ങളെല്ലാം കഴിയുമ്പോൾ ഉണ്ടാവുന്ന ഊറിവരുന്ന ഒരു ചിരി ഈ സിനിമ കാത്തുവച്ചിട്ടുണ്ടെന്ന് മോഹൻലാൽ കുറിച്ചു. അതേസമയം മകന്റെ അഭിനയത്തെ കുറിച്ചൊന്നും നടൻ കുറിപ്പിൽ സൂചിപ്പിച്ചിട്ടില്ല.
ജനഹൃദയങ്ങൾ കീഴടക്കിയ ഹൃദയം എന്ന സിനിമയ്ക്ക് ശേഷം വിനീത് ശ്രീനിവാസൻ പ്രണവ് മോഹൻലാൽ കൂട്ടുകെട്ടിലെത്തുന്ന ചിത്രമാണ് വർഷങ്ങൾക്ക് ശേഷം. ധ്യാൻ ശ്രീനിവാസൻ, നിവിൻ പോളി തുടങ്ങിയവരാണ് ചിത്രത്തിൽ പ്രധാന വേഷങ്ങളിൽ എത്തുന്നത്. കേരളത്തിൽ നിന്ന് റിലീസ് ദിനത്തിൽ 3 കോടി നേടിയ ചിത്രത്തിൻറെ രണ്ടാം ദിനത്തിലെ കളക്ഷൻ 2.26 കോടിയായിരുന്നത്.
മോഹൻലാലിന്റെ ഫേയ്സ്ബുക്ക് പോസ്റ്റിന്റെ പൂർണരൂപം ഇങ്ങനെ
‘കടന്നു പോയ കാലത്തിലേക്ക് ജീവിത സായാഹ്നത്തിൽ തിരിഞ്ഞു നോക്കാത്തവരുണ്ടാകുമോ….? എത്ര ചെറുതായാലും ശരി നേട്ടങ്ങൾക്ക് നടുവിൽ നിന്ന് അങ്ങനെ തിരിഞ്ഞു നോക്കുമ്പോൾ ദൂരെ ഏറിയോ കുറഞ്ഞോ യാതനകളുടെ അധ്യായം കാണാം. വിനീത് ശ്രീനിവാസൻ എഴുതി സംവിധാനം ചെയ്ത വർഷങ്ങൾക്ക് ശേഷം എന്ന സിനിമ കണ്ടപ്പോൾ ഞാനും എന്റെ പഴയ കാലങ്ങളിലേക്ക് പോയി.
കഠിനമായ ഭൂതകാലത്തെ അതേ തീവ്രതയോടെ പുനരാവിഷ്കരിക്കുകയല്ല വിനീത് ചെയ്തിരിക്കുന്നത്. അനുഭവകാലങ്ങളെല്ലാം ഉണ്ടാകുന്ന ഊറിവരുന്ന ഒരു ചിരി ഈ സിനിമ കാത്തു വച്ചിരിക്കുന്നു. വർഷങ്ങൾക്ക് ശേഷം എന്ന സിനിമയുടെ എല്ലാ പ്രവർത്തകർക്കും എന്റെ നന്ദി, സ്നേഹപൂർവ്വം മോഹൻലാൽ’
Discussion about this post