അടുത്തിടെയായി ആഗോളവേദികളിൽ വളരെയധികം ഉയർന്നു കേൾക്കുന്ന പേരാണ് നമ്മുടെ ഭാരതത്തിന്റേത്. വിവിധ രംഗങ്ങളിൽ നാം കൈവരിച്ചിട്ടുള്ള നിർണായക നേട്ടങ്ങൾ ആണ് ഇതിന് കാരണം. ഇപ്പോഴിതാ മറ്റൊരു സുപ്രധാന നേട്ടം കൂടി നമ്മെ തേടിയെത്തിയിരിക്കുകയാണ്. ലോകത്തെ ഏറ്റവും മികച്ച ഹോട്ടലുകളുടെ പട്ടികയിൽ നമ്മുടെ രാജ്യത്ത് നിന്നുള്ള രണ്ട് ഹോട്ടലുകൾ ഇടം നേടിയെന്നതാണ് പുതുതായി അഭിമാനിക്കാൻ നമുക്ക് വക നൽകുന്നത്.
വില്യം റീഡ് മീഡിയ കമ്പനിയാണ് ലോകത്തെ ഏറ്റവും മികച്ച ഹോട്ടലുകളുടെ പട്ടിക തയ്യാറാക്കിയത്. 100 ഹോട്ടലുകളെ ഉൾപ്പെടുത്തി കൊണ്ട് തയ്യാറാക്കിയ പട്ടികയിൽ മുംബൈയിലെ മാസ്ക് റസ്റ്റോറന്റും ന്യൂഡൽഹിയിലെ ഇന്ത്യൻ ആക്സന്റുമാണ് ഇടംപിടിച്ചിരിക്കുന്നത്. മാസ്ക് റസ്റ്റോറന്റിന് 78ാം സ്ഥാനം ലഭിച്ചപ്പോൾ, ആഗോള റാങ്കിംഗിൽ 89ാമതാണ് ഇന്ത്യൻ ആക്സന്റ്.
അതിഥി ദുർഗാർ ആണ് മാസ്ക് റസ്റ്റോറന്റിന്റെ സ്ഥാപകൻ. വരുൺ ടോട്ട്ലാനിയാണ് ഇവിടുത്തെ ഹെഡ്ഷെഫ്. അദ്ദേഹത്തിന്റെ നേതൃത്വത്തിലാണ് ആളുകൾക്കായി ഇവിടെ വിഭവങ്ങൾ ഒരുങ്ങുന്നത്. ഏഷ്യയിലെ മികച്ച 50 റെസ്റ്റോറന്റുകളുടെ പട്ടികയിലും മാസ്ക് റസ്റ്റോറന്റ് സ്ഥാനം പിടിച്ചിട്ടുണ്ട്. വിഭവങ്ങളിലെ ചേരുവകളിലാണ് മാസ് റെസ്റ്റോറന്റ് പുതുമ തേടിയത്. രാജ്യത്ത് തന്നെയുള്ള ചേരുവകൾ കൊണ്ടുള്ള വിഭവങ്ങളാണ് ഇവിടെയെത്തുന്നവർക്ക് നൽകാറുള്ളത്. ഇന്ത്യയിലെ പ്രമുഖ ഹോട്ടലുകളിൽ ഒന്നായ മാസ്ക് റസ്റ്റോറന്റിൽ രാജ്യത്തിന് പുറത്തു നിന്നുള്ളവർ വരെ രുചി വൈവിധ്യം തേടാറുണ്ട്.
ഡൽഹിയിലെ ലോധിയിലാണ് ഹോട്ടൽ ഇന്ത്യൻ ആക്സന്റ് സ്ഥിതി ചെയ്യുന്നത്. മനീഷ് മെഹ്റോത്രയാണ് ഇതിന്റെ ഉടമ.
2015 മുതൽ 2021 വരെ തുടർച്ചയായി ഏഴ് വർഷം ഇന്ത്യയിലെ ഏറ്റവും മികച്ച റെസ്റ്റോറന്റായിരുന്നു ഇത്. ഈ വർഷം പുറത്തുവന്ന ഏഷ്യയിലെ മികച്ച ഹോട്ടലുകളുടെ പട്ടികയിൽ 26ാം സ്ഥാനവും ഇന്ത്യൻ ആക്സന്റിനുണ്ട്. രാജ്യത്തിനകത്തുതന്നെയുള്ള രുചി വിഭവങ്ങളാണ് ഇന്ത്യൻ ആക്സന്റ് വിളമ്പാറുള്ളത്. ഇതിനൊപ്പം പാശ്ചാത്യ വിഭവങ്ങളും മികച്ച രീതിയിൽ തയ്യാറാക്കി നൽകാറുണ്ട്.
ഇന്ത്യയിലെ ഹോട്ടലുകൾ ആഗോള റാങ്കിംഗിൽ ഇടംപിടിച്ചതോടെ നമ്മുടെ നാടിനെ ഭക്ഷണപ്പെരുമ കൂടിയാണ് ലോകം അറിഞ്ഞത്. അടുത്ത മാസം അഞ്ചിന് ലാസ് വെയ്ഗ്സിൽ നടക്കുന്ന പരിപാടിയിൽ ഹോട്ടലുകൾക്ക് വില്യം റീഡ് മീഡിയ കമ്പനി പുരസ്കാരങ്ങൾ കൈമാറും. വരും വർഷങ്ങളിൽ ഇന്ത്യയിൽ നിന്നുള്ള കൂടുതൽ ഹോട്ടലുകൾക്ക് ഈ നേട്ടം കൈവരിക്കാൻ സാധിക്കട്ടെയെന്ന് നമുക്ക് ആശംസിക്കാം
Discussion about this post