ന്യൂഡൽഹി: പുതിയ പാർലമെന്റ് മന്ദിരത്തിൽ സ്ഥാപിച്ചിട്ടുള്ള ചെങ്കോൽ നീക്കം ചെയ്യണം എന്ന ആവശ്യവുമായി എൻഡി സംഖ്യം. ഇൻഡിയുടെ ഭാഗമായ സമാജ് വാദി പാർട്ടിയുടെ എംപി ആർകെ ചൗധരിയാണ് ചെങ്കോൽ മാറ്റണമെന്ന ആവശ്യവുമായി രംഗത്ത് എത്തിയത്. ചെങ്കോൽ രാജവാഴ്ചയുടെ അരാജകത്വത്തിന്റെ പ്രതീകം ആണെന്നും എംപി ആരോപിച്ചു.
ജനാധിപത്യത്തിന്റെ പ്രതീകമാണ് ഭരണഘടന. രണ്ടാം മോദി സർക്കാരിന്റെ കാലത്താണ് പാർലമെന്റിൽ പ്രധാനമന്ത്രി ചെങ്കോൽ സ്ഥാപിച്ചത്. ചെങ്കോൽ എന്നാൽ രാജാക്കന്മാരുടെ ദണ്ഡ് ആണ്. രാജവാഴ്ചയുടെ അരാജകത്വത്തിന്റെ പ്രതീകം ആണ് ചെങ്കോൽ. അതിനാൽ പാർലമെന്റിൽ നിന്നും ചെങ്കോൽ നീക്കം ചെയ്യണം. ഭരണഘടനയുടെ സംരക്ഷണത്തിനായി അത് ആവശ്യമാണ് എന്നും ആർ.കെ ചൗധരി കൂട്ടിച്ചേർത്തു. ഇതുമായി ബന്ധപ്പെട്ട് പ്രൊട്ടേം സ്പീക്കർ ഭർതൃഹരി മഹ്താബിന് അദ്ദേഹം കത്തും നൽകി.
അതേസമയം ആർ.കെ ചൗധരിയുടെ ആവശ്യത്തിനെതിരെ ശക്തമായ വിമർശനവുമായി ബിജെപി രംഗത്ത് എത്തി. അഖിലേഷ് യാദവ് നേതൃത്വം നൽകുന്ന പാർട്ടി ഇന്ത്യയുടെ പാരമ്പര്യത്തെയും സംസ്‌കാരത്തെയും ആക്രമിക്കാൻ യാതൊരു മടിയും കാണിക്കുന്നില്ലെന്ന് ബിജെപി നേതാവ് ഷെഹ്‌സാദ് പൂനാവാല പറഞ്ഞു. രാജ്യത്തിന്റെ സംസ്‌കാരത്തിന്റെ ഭാഗമായ ചെങ്കോൽ പാർലമെന്റിൽ നിന്നും നീക്കം ചെയ്യണം എന്നാണ് ഇക്കൂട്ടരുടെ ആവശ്യം. ഇത് തമിഴ്‌നാടിനെയും സംസ്ഥാനത്തിന്റെ പാരമ്പര്യത്തെയും അവഹേളിക്കുന്നത് ആണെന്നും അദ്ദേഹം കൂട്ടിച്ചേർത്തു.
Discussion about this post