മുംബൈ : വിഖ്യാത ഗായിക ആശ ഭോസ്ലെയുടെ 90-ാം ജന്മദിനാഘോഷത്തിന്റെ ഭാഗമായുള്ള പുസ്തക പ്രകാശനം നിർവഹിച്ച് ആർഎസ്എസ് സര്സംഘചാലക് ഡോ. മോഹന് ഭാഗവത്. 90 വയസ്സിലേക്ക് കടക്കുന്ന ആശയ്ക്ക് വേണ്ടി പ്രശസ്തരായ 90 എഴുത്തുകാർ എഴുതിയ ലേഖനങ്ങളുടെയും അപൂർവ്വ ഫോട്ടോഗ്രാഫുകളുടെയും സമാഹാരമായ ‘സ്വരസ്വാമിനി ആശ’ എന്ന പുസ്തകമാണ് മോഹൻ ഭാഗവത പ്രകാശനം നടത്തിയത്.
മുംബൈ ദിനാനാഥ് മങ്കേഷ്കര് ഓഡിറ്റോറിയത്തിൽ വച്ച് നടന്ന ചടങ്ങിൽ നിരവധി ഗായകരും അഭിനേതാക്കളും പങ്കെടുത്തു. പ്രശസ്ത ഗായികയും പത്മവിഭൂഷൺ, മഹാരാഷ്ട്രഭൂഷൺ എന്നീ പുരസ്കാര ജേതാവുമായ ആശ ഭോസ്ലെയ്ക്കുള്ള ആദരസൂചകമായി വാല്യൂബിൾ ഗ്രൂപ്പ് ആണ് ‘സ്വരസ്വാമിനി ആശ’ പുറത്തിറക്കിയിട്ടുള്ളത്.
സംഗീതത്തിലൂടെ ഭക്തിയും ദേശസ്നേഹവും വളർത്താൻ ആശ ഭോസ്ലെയ്ക്ക് കഴിഞ്ഞതായി ശ്രീ മോഹൻ ഭാഗവത് വ്യക്തമാക്കി. “സംഗീതത്തിൻ്റെ ഉദ്ദേശ്യം കേവലം വിനോദത്തേക്കാൾ കൂടുതലാണ്, അത് സാമൂഹിക നേട്ടങ്ങൾ നൽകണം. മങ്കേഷ്കർ കുടുംബം അവരുടെ സംഗീതത്തിലൂടെ ജനങ്ങളിൽ ദേശസ്നേഹം വളർത്തിയെടുത്തു, അതിനാൽ സംഗീത ലോകത്തിന് മങ്കേഷ്കർ കുടുംബം നൽകിയ സംഭാവനകളോട് എനിക്ക് എന്നും ബഹുമാനമുണ്ട്. മങ്കേഷ്കർ കുടുംബത്തോടുള്ള എൻ്റെ ബഹുമാനം കൊണ്ടാണ് ഞാൻ ഈ പരിപാടിയിൽ ഇവിടെ എത്തിയിരിക്കുന്നത്. ഒരു പാട്ട് കേവലം വിനോദമല്ല, മറിച്ച് മികച്ച സന്ദേശങ്ങളും വികാരങ്ങളും സമ്മാനിക്കാനും സംഗീതത്തിന് കഴിയും. അങ്ങനെയുള്ള സംഗീതത്തിലൂടെ ഭാരതത്തിൻ്റെ ചരിത്രത്തിൽ ഇടം പിടിച്ചവരാണ് മങ്കേഷ്കർ കുടുംബം” എന്നും മോഹൻ ഭാഗവത് വ്യക്തമാക്കി.
Discussion about this post