നിർണായകമായ ക്വാഡ് പദ്ധതികൾ; ഇന്ത്യ എന്നും കൂടെയുണ്ടാകണമെന്ന് വ്യക്തമാക്കി അമേരിക്ക

വാഷിംഗ്‌ടൺ: അമേരിക്കൻ തിരഞ്ഞെടുപ്പിന് ശേഷം ക്വാഡിന്റെ ഭാവിയെന്ത് എന്ന ചോദ്യത്തിനുത്തരം മോദിയുടെ ചുമലിൽ കൈവച്ചു കൊണ്ട് പറഞ്ഞ് അമേരിക്കൻ പ്രസിഡന്റ് ജോ ബൈഡൻ.

നവംബറിനു ശേഷവും ഒരുപാട് കാലം ക്വാഡ് ഇവിടെ കാണും എന്ന് ജോ ബൈഡൻ വ്യക്തമാക്കി. അതേസമയം മറുപടി പറയുമ്പോൾ ജോ ബൈഡൻ നരേന്ദ്ര മോദിയുടെ ചുമലിൽ കൈവച്ചത് ശ്രദ്ധേയമായി. ഇൻഡോ പസിഫിക്കിലെ അമേരിക്കയുടെ വിദേശ കാര്യ നയത്തിന്റെ പ്രധാനകേന്ദ്രം ഇന്ത്യ ആയിരിക്കുമെന്ന സൂചനയാണ് തന്റെ ശരീര ഭാഷയിലൂടെ ജോ ബൈഡൻ വ്യക്തമാക്കിയത് എന്നാണ് വിലയിരുത്തപ്പെടുന്നത്.

2024 നവംബർ 5, 2024 നാണ് യുഎസ് പ്രസിഡൻഷ്യൽ തിരഞ്ഞെടുപ്പ്. എന്നാൽ ജൂലൈയിൽ തന്നെ ബൈഡൻ മത്സരത്തിൽ നിന്ന് പിൻവാങ്ങിയിരിന്നു. ഇതിനെ തുടർന്ന് നിലവിലെ വൈസ് പ്രസിഡൻ്റ് കമലാ ഹാരിസാണ് ഡെമോക്രാറ്റിക് നോമിനിയായി മത്സരിക്കുന്നത് . റിപ്പബ്ലിക്കൻ സ്ഥാനാർത്ഥി മുൻ പ്രസിഡൻ്റ് ഡൊണാൾഡ് ട്രംപിനെയാണ് അവർ നേരിടുന്നത്.

ശനിയാഴ്ച, പ്രസിഡൻ്റ് ബൈഡൻ പ്രധാനമന്ത്രി മോദി, ഓസ്‌ട്രേലിയൻ പ്രധാനമന്ത്രി ആൻ്റണി അൽബാനീസ്, ജാപ്പനീസ് പ്രധാനമന്ത്രി ഫ്യൂമിയോ കിഷിദ എന്നിവരുമായി ക്വാഡ് കൂടിക്കാഴ്ച നടത്തിയിരുന്നു.

“ഇന്തോ-പസഫിക്കിന് യഥാർത്ഥ പോസിറ്റീവ് സ്വാധീനം ചെലുത്തുന്നതിനുള്ള ഒരു കൂട്ടം പദ്ധതികൾ ഞങ്ങൾ ഇന്ന് പ്രഖ്യാപിക്കുന്നതായി ജോ ബൈഡൻ അറിയിച്ചു. ക്വാഡ് അംഗരാജ്യങ്ങൾക്ക് തങ്ങളുടെ സമുദ്രാതിർത്തികളിൽ നിരീക്ഷണം നടത്താൻ പുതിയ മാരിടൈം സാങ്കേതികവിദ്യകൾ നൽകുന്നതും കോസ്റ്റ് ഗാർഡുകൾക്കിടയിൽ സഹകരണം സ്ഥാപിക്കുന്നതും ഇതിൽ ഉൾപ്പെടുന്നു.