അടിമാലി: കഞ്ചാവ് ബീഡി കത്തിക്കാന് തീപ്പെട്ടി ചോദിച്ച് സ്കൂള് വിദ്യാർഥികൾ കയറിച്ചെന്നത് എക്സൈസ് ഓഫീസില്. അടിമാലി എക്സൈസ് എന്ഫോഴ്സ്മെന്റ് സ്ക്വാഡ് ഓഫീസിലാണ് രസകരമായ സംഭവം നടന്നത് . തൃശൂരിലെ സ്കൂളില് നിന്ന് മൂന്നാറിലേക്ക് ടൂര് പോയ വിദ്യാര്ഥികളാണ് കഞ്ചാവ് ബീഡി കത്തിക്കാന് തീ ചോദിച്ച് എക്സൈസ് ഓഫീസിലേക്ക് കയറി ചെന്നത് .
എക്സൈസ് ഓഫീസിന്റെ പുറകിലൂടെയായിരുന്നു വിദ്യാർത്ഥികൾ കടന്നു ചെന്നത് . കെട്ടിടത്തിന് പിന്നില് കേസില് പിടിച്ച വാഹനങ്ങള് കിടക്കുന്നത് കണ്ട് വര്ക്ക് ഷോപ്പാണെന്നാണ് ഇവർ ആദ്യം കരുതിയത്. പുറകിലൂടെ കയറി വന്നതിനാല് എക്സൈസ് ഓഫീസ് എന്ന ബോര്ഡും വിദ്യാര്ഥികള് കണ്ടിരുന്നില്ല. കെട്ടിടത്തിനുള്ളില് യൂണിഫോമിലുള്ളവരെ കണ്ടതോടെ രക്ഷപ്പെടാന് ശ്രമിച്ച വിദ്യാര്ഥികളെ ഉദ്യോഗസ്ഥര് പിടികൂടുകയായിരുന്നു.
സര്ക്കിള് ഇന്സ്പെക്ടര് രാഗേഷ് ബി ചിറയത്തിന്റെ നേതൃത്വത്തില് നടത്തിയ പരിശോധനയില് വിദ്യാര്ഥികളില് നിന്ന് 5 ഗ്രാം കഞ്ചാവും ഒരു ഗ്രാം ഹാഷിഷ് ഓയിലും കണ്ടെടുത്തു. മയക്കുമരുന്ന് പിടിച്ചെടുത്തതോടെ എക്സൈസ് ഉദ്യോഗസ്ഥർ അധ്യാപകരെ വിളിച്ചുവരുത്തുകയും വിദ്യാര്ഥികള്ക്ക് കൗണ്സിലിങ് നല്കുകയും ചെയ്തു. ഇതേ തുടർന്ന് ലഹരി കണ്ടെത്തിയ വിദ്യാര്ഥികള്ക്കെതിരെ കേസെടുത്തു. മാതാപിതാക്കളെയും സ്ഥലത്തേക്ക് വിളിച്ചുവരുത്തി.
Discussion about this post