അബുദാബി: വൃത്തിഹീനമായ സാഹചര്യങ്ങളില് പ്രവര്ത്തിച്ചതുള്പ്പെടെ ഭക്ഷ്യ സുരക്ഷാ നിയമങ്ങള് ലംഘിച്ചതായി കണ്ടെത്തിയ ഒരു ഹൈപ്പര് മാര്ക്കറ്റിനും അഞ്ച് റസ്റ്റോറന്റുകള്ക്കും എതിരേ ശക്തമായ നടപടി സ്വീകരിച്ച് അബുദാബി അഗ്രികള്ച്ചര് ആന്ഡ് ഫുഡ് സേഫ്റ്റി അതോറിറ്റി.
അബുദാബിയിലെ അല് ഖാലിദിയ (വെസ്റ്റ് 6) പ്രദേശത്തുള്ള ‘സേവ് വേ’ സൂപ്പര്മാര്ക്കറ്റാണ് അധികൃതരുടെ അഡ്മിനിസ്ട്രേറ്റീവ് അടച്ചുപൂട്ടല് ഉത്തരവ് പ്രകാരം പൂട്ടിയത്. അബുദാബി എമിറേറ്റിലെ ഭക്ഷ്യ സുരക്ഷയുമായി ബന്ധപ്പെട്ട 2008 ലെ നിയമം (2) ലംഘിച്ചതിനും അതുവഴി പൊതുജനാരോഗ്യത്തിന് അപകടമുണ്ടാക്കിയതിനും 2024ല് നാല് റെസ്റ്റോറന്റുകള്ക്കും ഒരു ഭക്ഷ്യ സ്ഥാപനത്തിനുമെതിരെ അടച്ചുപൂട്ടല് ഉത്തരവുകള് പുറപ്പെടുവിച്ചതായും അതോറിറ്റി അറിയിച്ചു.
ഭക്ഷ്യ സുരക്ഷയുടെ പൊതുവായ ആവശ്യകതകള് പാലിക്കുന്നതില് സ്ഥാപനങ്ങള് പരാജയപ്പെട്ടതും അവ ചൂണ്ടിക്കാട്ടിയ ശേഷവും ഫലപ്രദമായ തിരുത്തല് നടപടികള് സ്വീകരിക്കുന്നതില് റെസ്റ്റോറന്റ്, സ്ഥാപന ഉടമകളുടെ ഭാഗത്തു നിന്നുണ്ടായ അശ്രദ്ധയുമാണ് അടച്ചുപൂട്ടല് തീരുമാനങ്ങള്ക്ക് കാരണമെന്ന് അതോറിറ്റി വ്യക്തമാക്കി. നിയമ ലംഘനങ്ങള് നിലനില്ക്കുന്നിടത്തോളം കാലം സ്ഥാപനത്തിനെതിരായ അടച്ചുപൂട്ടല് നടപടി തുടരും.
അതേസമയം, തിരുത്തല് നടപടികള് സ്വീകരിച്ച് ബിസിനസ് പ്രവര്ത്തനങ്ങള്ക്ക് ആവശ്യമായ എല്ലാ ആവശ്യകതകളും പാലിച്ചുകഴിഞ്ഞാല് പ്രവര്ത്തനങ്ങള് പുനരാരംഭിക്കാമെന്നും അതോറിറ്റി വ്യക്തമാക്കി.
വൃത്തിഹീനമായ റഫ്രിജറേറ്ററുകള് പോലുള്ള ഉപകരണങ്ങള്, ജീവനക്കാര്ക്ക് ഭക്ഷ്യസാധനങ്ങള് കൈകാര്യം ചെയ്യുന്നവര്ക്കുള്ള പരിശീലന സര്ട്ടിഫിക്കറ്റുകള് ഇല്ലാത്തത്, വിളമ്പാന് തയാറാക്കിയ ഭക്ഷണം അനുചിതമായ താപനിലയില് പ്രദര്ശിപ്പിക്കുന്നത്, ഷെല്ഫുകള്, ഭക്ഷണവുമായി സമ്പര്ക്കം പുലര്ത്തുന്ന പ്രതലങ്ങള് എന്നിവ വൃത്തിയാക്കാത്തത്,
ഭക്ഷണം തയാറാക്കുന്ന സ്ഥലങ്ങളില് സംരക്ഷണ വസ്ത്രങ്ങള് (ഹെയര്നെറ്റുകള്, കയ്യുറകള് പോലുള്ളവ) ധരിക്കാത്തത് എന്നിവയുള്പ്പെടെ ധാരാളം ലംഘനങ്ങളാണ് അടച്ചുപൂട്ടലിന് കാരണമെന്ന് അതോറിറ്റി പറയുന്നു.
Discussion about this post