മുൻ പാകിസ്ഥാൻ ക്യാപ്റ്റൻ ഷാഹിദ് അഫ്രീദിയുമായി കളിക്കളത്തിൽ ഉണ്ടായ അനുഭവങ്ങളെക്കുറിച്ച് മുൻ ഇന്ത്യൻ ഓൾറൗണ്ടർ ഇർഫാൻ പത്താൻ അടുത്തിടെ ചില അഭിപ്രായങ്ങൾ പങ്കുവെച്ചു. അഫ്രീദി പലപ്പോഴും കളിക്കളത്തിൽ തന്നെ അസ്വസ്ഥനാക്കാൻ ശ്രമിച്ചിരുന്നുവെന്നും നിരവധി കളിയാക്കൽ പരാമർശം നടത്തിയിരുന്നുവെന്നും പത്താൻ വെളിപ്പെടുത്തി.
ഈ വെളിപ്പെടുത്തലുകൾ സോഷ്യൽ മീഡിയയിൽ വലിയ ചർച്ചകൾക്ക് വഴിയൊരുക്കി, അഫ്രീദിയുടെ സഹതാരവും മുൻ പാകിസ്ഥാൻ സ്പിന്നറുമായ ഡാനിഷ് കനേരിയ പത്താന്റെ വാദങ്ങളെ പിന്തുണച്ചു വന്നിരിക്കുകയാണ്. ‘ക്ലാസും മാന്യതയും ഇല്ലാത്ത’ കളിക്കാരൻ എന്നാണ് അഫ്രീദിയെ കനേരിയ വിശേഷിപ്പിച്ചത്.
ലാലന്റോപ്പിന് നൽകിയ അഭിമുഖത്തിൽ, ഇരുവരും തമ്മിലുള്ള ശത്രുതയ്ക്ക് തുടക്കമിട്ടത് എന്താണെന്ന് വെളിപ്പെടുത്തി ഇർഫാൻ പത്താൻ വന്നിരിക്കുകയാണ്. “എന്റെ കരിയറിൽ 11 തവണ ഞാൻ ഷാഹിദ് അഫ്രീദിയെ പുറത്താക്കിയിട്ടുണ്ട്.. ഹർഷ ഭോഗ്ലെയുമായുള്ള അദ്ദേഹത്തിന്റെ ഒരു അഭിമുഖം ഉണ്ടായിരുന്നു. ‘ഞാൻ ആണ് യഥാർത്ഥ പത്താൻ എന്നൊക്കെ…, ഇർഫാൻ അങ്ങനെയല്ല’ എന്ന് അദ്ദേഹം പറഞ്ഞു. അത് എനിക്ക് ദേഷ്യത്തിന് കാർണാമാക്കി” ഇർഫാൻ പത്താൻ പറഞ്ഞു.
“അദ്ദേഹം എന്നെക്കുറിച്ചല്ല, എന്റെ മാതാപിതാക്കളെക്കുറിച്ചാണ് സംസാരിക്കുന്നതെന്ന് എനിക്ക് തോന്നി. ഇതെല്ലാം അദ്ദേഹം പറഞ്ഞില്ലായിരുന്നെങ്കിൽ, എനിക്ക് അദ്ദേഹവുമായി ഒരു പ്രശ്നവും ഉണ്ടാകുമായിരുന്നില്ല. പക്ഷേ വ്യക്തി എന്ന നിലയിൽ ഇത്തരം പദങ്ങൾ പറഞ്ഞ് അധിക്ഷേപിക്കുന്നത് മോശമായി തോന്നി. അതിനാൽ, ഞാൻ അദ്ദേഹത്തിനെതിരെ പോരാടുമ്പോഴെല്ലാം, അയാളെ ജയിക്കാൻ ഞാൻ ആഗ്രഹിച്ചു” ഇർഫാൻ പറഞ്ഞു നിർത്തി.
ഡാനിഷ് കനേരിയ പറയുന്നത് ഇങ്ങനെ- ” ഇർഫാൻ ഭായ്, നിങ്ങൾ പറഞ്ഞത് തികച്ചും ശരിയാണ്. അയാൾ എപ്പോഴും വ്യക്തിപരമായ ആക്രമണങ്ങൾ നടത്തും – അത് ഒരാളുടെ കുടുംബത്തെയോ മതത്തെയോ ആകാം. ക്ലാസും മാന്യതയും ഉള്ള വ്യക്തി അല്ല അദ്ദേഹം.”
Discussion about this post