ഗാസയിൽ സൈന്യത്തെ വിന്യസിക്കുമെന്ന വാർത്തകൾ സ്ഥിരീകരിച്ച് പാകിസ്താൻ. പാക് ഉപ പ്രധാനമന്ത്രി ഇസ്ഹാഖ് ധാറാണ് ഇക്കാര്യം സ്ഥിരീകരിച്ച് രംഗത്തെത്തിയത്. അന്താരാഷ്ട്ര സമാധാന ദൗത്യത്തിന്റെ ഭാഗമായാണ് പാകിസ്താൻ സുരക്ഷാ സേനയെ വിന്യസിക്കുന്നത്. എന്നാൽ പലസ്തീൻ ഭീകര സംഘടനയായ ഹമാസിനെ നിരായുധീകരിക്കുന്നതിൽ തങ്ങളുടെ സൈന്യം പങ്കെടുക്കില്ലെന്ന് പാക് ഉപപ്രധാനമന്ത്രി പറയുന്നു. ഐക്യരാഷ്ട്രസഭ സുരക്ഷാ കൗൺസിലിന്റെ വ്യക്തമായി നിർവചിക്കപ്പെട്ട ഉത്തരവിന് കീഴിൽ മാത്രമേ പാകിസ്താൻ സൈന്യത്തെ അയയ്ക്കൂ എന്ന് ഇസ്ഹാഖ് ധാർ പറയുന്നു.
ഗാസയുടെ പുനരുദ്ധാരണത്തിനുള്ള സമാധാന സേനയിലേക്ക് മുസ്ലീം ഭൂരിപക്ഷ രാജ്യങ്ങളിൽ നിന്നാണ് പ്രധാനമായും സൈനികർ എത്തുന്നത്. വൈകാതെ പാക് സൈന്യം ഗാസയിൽ എത്തുമെന്നും ഇതിനായുള്ള അന്തിമ ചർച്ചകളിലാണെന്നുമായിരുന്നു റിപ്പോർട്ടുകൾ. ഇത് ശരിവയ്ക്കുന്ന സ്ഥിരീകരണമാണ് പാക് ഉപപ്രധാനമന്ത്രിയിൽ നിന്ന് ഉണ്ടായിരിക്കുന്നത്.
നിരായുധീകരണമടക്കമുള്ള വിഷയങ്ങൾ പലസ്തീനിലെ ഭരണകൂടത്തിൻറെ മാത്രം പരിധിയിലുള്ളതാണ്. സമാധാന പാലനം മാത്രമാണ് പാക്കിസ്ഥാൻറെ ജോലി. ഫീൽഡ് മാർഷൽ അസിം മുനീറുമായി പ്രധാനമന്ത്രി ഷഹബാസ് ഷെരീഫ് ഇക്കാര്യം നേരത്തെ തന്നെ ചർച്ച ചെയ്തിട്ടുണ്ട്. അന്തിമ ധാരണയായാൽ സംഘത്തെ അയയ്ക്കുമെന്നും ഇസ്ഹാഖ് ധാർ കൂട്ടിച്ചേർത്തു.
വെറുതെ നൽകുന്ന സേവനമല്ല ഗാസയിൽ പാകിസ്താന്റേത്. സൈനിക വിന്യാസത്തിന് പകരമായി പാകിസ്താന് വലിയ സാമ്പത്തിക പാക്കേജുകൾ ലഭിക്കും. ലോക ബാങ്ക് വായ്പാ ഇളവ്, തിരിച്ചടവിന് കൂടുതൽ ഗഡുക്കൾ തുടങ്ങിയവയടക്കം പലതരം സാമ്പത്തിക സഹായങ്ങൾ പാകിസ്താന് ഇസ്രയേലും അമേരിക്കയും വാഗ്ദാനം ചെയ്തതായി റിപ്പോർട്ടിൽ പറയുന്നു.
ഇസ്രയേൽ-ഗാസ യുദ്ധം ട്രംപിന്റെ ഇടപെടലിലൂടെ അവസാനിച്ചിരുന്നു. വെടിനിർത്തൽ ഉടമ്പടി ഇരു ഭാഗവും അംഗീകരിച്ചു. ഇതേത്തുടർന്ന് ബന്ദികളെ പരസ്പരം കൈമാറുകയും ചെയ്തിരുന്നു.
